O Festival Internacional de Monicreques Galicreques celebrará a súa edición número 29 entre o 12 e o 20 de outubro, cunha programación que incluirá unha quincena de funcións de monicreques para público escolar, ofrecidas por compañías procedentes de Galicia e doutros puntos de España, así como de Colombia, Ecuador ou O Salvador.
Así, o festival, organizado pola Asociación Cultural Barriga Verde coa colaboración do Concello de Santiago, a Agadic, a Deputación da Coruña, o Inaem, Iberescena e a Fundación SGAE, reedita un ano máis o seu dobre compromiso de achegarlles aos mozos espectadores o xénero escénico dos monicreques para a creación de novos públicos.
Os espazos nos que se realizarán as funcións da programación para escolares serán a Fundación Sgae, o Teatro Principal e o Centro Sociocultural Santa Marta, así como a tradicional carpa da Alameda.
A programación escolar do Festival Galicreques está destinada para todos os niveis do ensino obrigatorio, tanto para Infantil e Primaria como para os institutos.
