A alcaldesa de Santiago de Compostela, Goretti Sanmartín, respondeu este mércores ás críticas lanzadas polo líder do PP compostelán, Borja Verea, quen responsabilizou á rexedora da subida do canon de Sogama polo seu apoio ao goberno de Pedro Sánchez. Sanmartín afirmou que Verea “perdeu a súa credibilidade hai tempo” e cualificou as súas declaracións como un intento de “atacar por atacar” sen base sólida.
Ante as preguntas dos medios, Sanmartín destacou que este tipo de acusacións carecen de argumentación real e representan un intento de “manipular a realidade”. Afirmou que o canon de Sogama está “cedido, xestionado e solicitado pola Xunta”, e que se basea nun modelo que as directivas europeas penalizan por estar “obsoleto”. Ademais, considerou que culpar á alcaldesa desta cuestión é unha perda de credibilidade por parte do líder popular.
Verea, nunhas declaracións anteriores, asegurara que tanto a rexedora como o BNG eran responsables da subida por apoiar ao goberno central. Sanmartín respondeu a esta acusación dicindo que “convertir isto nunha responsabilidade da alcaldesa de Santiago é un desprezo á intelixencia dos veciños” e reafirmou que non vale a pena responder a quen “manipula e tergiversa a realidade”.
Contratación dun asesor municipal
Ademais, Borja Verea acusou ao goberno local de “escurantismo” na contratación dun novo asesor municipal. Sanmartín replicou que o líder do PP ofrece “cifras que non se corresponden coa realidade” e reiterou que estas críticas forman parte dunha estratexia que busca desprestixiar sen fundamento.
RESPOSTA Á SUBIDA DO CANON
Con respecto á subida do canon de Sogama, Sanmartín destacou que o Concello de Santiago quere ser un dos que “de exemplo” na contestación a esta medida. A rexedora subliñou a súa intención de acordar unha declaración institucional coas demais forzas políticas para rexeitar o modelo que a Xunta impón, que considera “inxusto e desproporcionado”. Se non se logra un acordo por unanimidade, asegurou que buscará unha “moción maioritaria” para expresar a oposición do concello a esta situación.
Sanmartín rematou sinalando que “a maior parte da xente á fronte das alcaldías recoñece que esta situación é inxusta”, polo que espera contar co apoio necesario para facer fronte á decisión da Xunta.
