O Concello de Ames finalizou a súa programación de campamentos de verán co peche da última quenda, que se desenvolveu do 28 de agosto ao 2 de setembro na granxa escola El Kiriko. Este ano, un total de 490 rapaces e rapazas participaron nas distintas actividades organizadas, cubrindo o 98 % das prazas ofertadas, segundo informou a Concellaría de Mocidade e Educación.
O programa, que comezou o pasado 23 de xuño, incluíu 13 campamentos con estadía nocturna e dúas quendas de campamento urbano na Aula da Natureza, celebradas entre o 1 e o 26 de xullo. Estas actividades estiveron dirixidas a nenos e mozos de entre 6 e 16 anos, ofrecendo unha combinación de aprendizaxe, lecer e contacto coa natureza.
A concelleira de Educación e Mocidade, Carmen Porto, destacou que o servizo busca “facilitar a conciliación das familias durante as vacacións de verán”, mentres que o concelleiro de Xestión do Medio Rural, Javier Antelo, subliñou a importancia de “fomentar a convivencia, a cooperación e o respecto entre os participantes”, ademais de promover o achegamento ao medio rural.
Os campamentos, organizados en diferentes localizacións como a granxa escola de Bergando, a praia de Patos ou o Cámping O Terrón, permitiron que nenos e mozos de todas as idades participasen en actividades ao aire libre, deportes e obradoiros de temática ambiental. Ademais, para os máis pequenos, a Aula da Natureza ofreceu un campamento urbano cunha programación centrada no descubrimento das posibilidades que ofrece o medio natural.
A edición deste ano dos campamentos municipais foi valorada moi positivamente tanto pola administración local como polas familias participantes, consolidándose como unha oferta clave para a conciliación e o desenvolvemento persoal dos máis novos en Ames.
