O líder do PP de Santiago, Borja Verea, asegurou este martes que, despois de 15 meses na alcaldía de Santiago, a xestión do BNG foi “decepcionante” e cualificou ao goberno local de “ineficaz”, “vago” e “sectario”.
Nesta liña, Verea esgrimiu que un ano e medio despois, o “abandono” dos barrios é “total” e que os concelleiros nacionalistas demostraron que a cidade está “máis sucia, máis triste e máis cohibida”. “A única resposta posible é que os concelleiros do BNG non saben traballar ou non teñen ganas de traballar”, afeou o líder do PP compostelán nunha rolda de prensa no Pazo de Raxoi.
Deste xeito, denunciou a situación “crítica” dos autobuses de Santiago, xa que o contrato para renovar a frota está atrasado desde fai “dez anos”. “A alcaldesa é cómplice respecto desta cuestión, porque puxo á fronte desta área aos responsables que nos meteron nesta lea”, afeou Verea á rexedora nacionalista, Goretti Sanmartín.
“DESMANTELAMENTO” TECIDO CULTURAL
Por outra banda, tamén indicou que o goberno local “está a desmantelar” o tecido cultural compostelán, por exemplo coa “perda” do festival WOS. “Trátase dun dos festivais máis internacionais e máis vangardistas que ven realizando todos os setembros e que por primeira vez neste 2024 non se vai a celebrar“, lamentou Verea.
Segundo detallou, outro dos exemplos deste “desmantelamento” cultural é que as festas da Ascensión e do Apóstolo deste ano foron as “peores festas”, celebracións “sen ambición, sen proxección, sen personalidade e pensadas para uns poucos”.
APARCADOIRO NO HOSPITAL CLÍNICO
Con todo, o popular tamén puxo o foco en que os nacionalistas “publicitaron unhas 20 veces durante o último ano” o acordo para o aparcadoiro do Hospital Clínico de Santiago, un “éxito” que considera que é do PP. “Nós puxemos sobre a mesa esa infraestrutura cando a ninguén se lle pasase nin pola cabeza a posibilidade de facer un aparcadoiro dentro do recinto hospitalario”, defendeu.
Deste xeito, subliñou que o PP de Santiago “defendeu” esta postura “a pesar das risas e dos chascarrillos”. Así mesmo, asegurou que este é o “mellor exemplo” de que os populares traballan co “único obxectivo” de ser “útiles” para os veciños.
