Santiago de Compostela acollerá desde este luns ata este sábado a oitava edición do festival herDanza, un evento de danza contemporánea que conta cun “amplo abano” de actividades para “gozar das artes do movemento” en diferentes escenarios da capital galega. O festival, organizado por Can Cun Quinqué, tamén conta co apoio do Concello de Santiago e de entidades como o Museo do Pobo Galego, o Centro Galego de Arte Contemporánea (CGAC) ou o Instituto Francés.
Segundo explicou o goberno municipal nunha nota de prensa, o principal obxectivo deste festival é “conxugar” a dinamización e a promoción da danza contemporánea coa aposta polos traballos de creadores galegos e co goce do patrimonio arquitectónico da cidade. Deste xeito, o programa desta edición ofrecerá ao público diferentes espectáculos que van desde ladanza de pequeno e mediano formato, ata unha residencia creativa, proxeccións de pezas audiovisuais ao redor desta arte, talleres formativos e outras actividades que se desenvolverán en lugares como a Casa das Máquinas, o Auditorio de Galicia, a igrexa das Ánimas ou o Museo do Pobo Galego, entre outros.
Nesta liña, a concelleira de Capital Cultural de Santiago, Míriam Louzao, presentou este luns a oitava edición deste festival nunha rolda de prensa na que tamén interviñeron o director do Museo do Pobo Galego, Manuel Vilar, o director do CGAC, Santiago Olmo, e do equipo directivo do propio festival.
Así, Louzao destacou o compromiso do HerDanza con servir de “xanela aos creadores emerxentes do país e favorecer un espazo de encontro e diálogo con artistas da contorna estatal e internacional”. Tamén subliñou que esta proposta permite á cidadanía “profundar” nesta achega “ás artes do movemento”, así como entrar en contacto con distintos puntos de vista, propostas e perspectivas “desde as que sentir a danza”.
RESIDENCIA CREATIVA
En concreto, a residencia creativa desta oitava edición recaerá sobre a compañía de danza Aselas ao redor da súa peza ‘Víscera’, que se desenvolverá a partir deste luns no Centro Xove Almáciga e o Auditorio de Galicia. A peza en cuestión “funde movemento e interpretación” para construír unha narrativa con ton de denuncia e emprega constantes musicais, poéticas, coreográficas e escenográficas que fan referencia “ao estómago, o oco e o baleiro”.
O resultado da residencia presentarase ante o público na última xornada do festival, o sábado 7 ás 17.30 horas na praza de San Martiño Pinario. Ademais desta peza, o público poderá gozar doutros cinco espectáculos, o primeiro deles será o xoves 5 ás 17.30 horas no Museo do Pobo Galego, cunha creación da bailarina cubana Lisvet Barcia.
