O Concello de Brión presentou un completo programa de actividades para o mes de setembro, co obxectivo de promover o comercio local e poñer en valor o sector primario. As iniciativas inclúen a primeira edición do Coworking Fest, a Ruta das Hortas e a sexta edición da Feira Labrega.
Segundo a concelleira de Promoción Económica, Guarina Rey Vázquez, “dende o Concello queremos apoiar o noso rural e promover o comercio dos mellores produtos que producen os nosos veciños e veciñas nas súas hortas”, destacou. Esta programación busca fortalecer a relación entre produtores e consumidores, promovendo a produción sostible e de calidade.
RUTA DAS HORTAS
A primeira das actividades será a Ruta das Hortas, que permitirá á veciñanza coñecer de preto as técnicas de produción sostible que empregan catro explotacións locais. As visitas, que se realizarán ao longo do mes de setembro, non requiren inscrición previa e teñen como punto de encontro o Coworking “Transformando en Brión”.
COWORKING FEST
Para dar a coñecer o espazo colaborativo de Montebalado, o Concello organiza o Coworking Fest o 18 e 19 de setembro. Esta primeira edición incluirá unha xornada de portas abertas e outra formativa sobre cooperativismo, dirixida tanto a usuarios do coworking como a persoas interesadas en proxectos colaborativos.
FEIRA LABREGA
O domingo 22 de setembro, o Adro da Igrexa dos Ánxeles acollerá a sexta edición da Feira Labrega, unha mostra gastronómica e artesá que destaca os produtos locais e os oficios tradicionais. A feira contará con degustacións en directo, exposicións, obradoiros e actuacións musicais, converténdose nun escaparate da riqueza cultural e produtiva de Brión.
MERCA EN BRIÓN
Este programa especial complementa os dous mercados semanais de Brión: o mercado urbano dos martes en Pedrouzos e o Mercado da Terra dos venres en Montebalado. Ademais, o Concello lanzará a campaña ‘Merca en Brión’, que incluirá a elaboración dunha guía de comercio local e a promoción dos negocios locais a través da App BrionInforma.
Con estas iniciativas, Brión busca dinamizar a economía local e fortalecer a conexión entre os consumidores e os produtores locais, reafirmando o seu compromiso co desenvolvemento sostible e a promoción do rural.
