As 24 persoas participantes na ‘Ruta contra os discursos de odio’, que este luns chegou a Santiago tras percorrer durante nove días Castela e León, Asturias e Galicia, preparan unha nova inidicativa similar centrada nas distintas loitas sociais, tanto históricas como actuais, da capital galega.
Ademais, estes mozos —procedentes de Asturias, Euskadi, Galicia, Aragón, Madrid e Andalucía— avalían realizar outras accións de devolución, como un encontro entre asociacións estratéxicas do cooperativismo en Madrid.
Esta ruta organizada por Aventeira, unha cooperativa de educación non formal, conseguiu unir a estes 24 activistas que este luns chegaron a Santiago tras nove días nos que puideron coñecer a historia da resistencia antifranquista da Cidade da Selva, as reivindicacións das mariscadoras das Rías Baixas e as loitas mineiras do século XX en Langreo, entre outras.
Durante a clausura desta acción, a subdirectora xeral de Análise e Estratexia da Axenda 2030 do Goberno de España felicitounos e instounos a loitar contra os discursos de odio no contexto actual. Tamén participaron outras autoridades como o concelleiro de Mobilidade, Convivencia e Centros Socioculturais, Xan Duro.
