O líder do Partido Popular en Santiago, Borja Verea, destacou a necesidade de que o Concello de Santiago implemente novas iniciativas para mellorar a vida das persoas maiores, centrando a súa proposta na estratexia fronte á soidade non desexada. Este plan inclúe a elaboración dun censo de persoas maiores que viven soas para garantir unha atención adecuada e evitar situacións de risco.
Verea subliñou que “é necesaria a elaboración dun censo para dispoñer de datos detallados sobre a situación das persoas maiores, facilitando así o acceso a recursos asistenciais e comunitarios.” A iniciativa tamén pretende crear un teléfono de atención ao maior para ofrecer soporte e paliar a soidade, permitindo unha intervención máis eficaz a través dos servizos sociais.
Ademais, o líder popular suxire a creación de vivendas colaborativas como alternativa ao modelo tradicional de residencias para maiores. Estas vivendas, que se aplican en países nórdicos, permitirían que as persoas maiores vivan en comunidade, con servizos asistenciais compartidos, favorecendo así o apoio mutuo e a redución do illamento social.
Verea tamén anunciou a Estratexia para unha Compostela Amigable coas persoas maiores, co fin de promover un envellecemento activo e saudable. Esta estratexia inclúe a creación de espazos e servizos que melloren o benestar físico, intelectual e emocional das persoas maiores, seguindo as directrices da rede de cidades amigables coas persoas maiores.
O PP considera que estas iniciativas son fundamentais para transformar Santiago en un exemplo de políticas sociaisefectivas e adaptadas ás necesidades das persoas maiores.
