O Pazo de Raxoi acollerá este luns, ás 13:00 horas, un acto institucional en memoria de Ánxel Casal, alcalde republicano de Santiago asasinado tras o golpe de estado de 1936. Este evento, que terá lugar no Salón Nobre de Raxoi, desenvolverase por segundo ano consecutivo e ten como obxectivo recoñecer a figura de Casal e ás persoas represaliadas xunto a el.
A homenaxe contará coa participación dos alcaldes de Santiago, Arzúa e Teo, Goretti Sanmartín, Xoán Xesús Carril e Juan Jesús Cerqueiro, respectivamente. Os representantes municipais intervirán para “visibilizar os lugares que marcaron os momentos finais da vida e loita de Casal”, segundo anunciou o Concello de Santiago.
Este acto institucional busca “honrar a dignidade colectiva das persoas que loitaron a favor da liberdade e da democracia e que foron represaliadas tras o golpe do 36”, co especial recoñecemento á figura de Casal, asasinado o 19 de agosto dese mesmo ano en Cacheiras.
Ánxel Casal, ademais de ser alcalde de Santiago en 1936, foi vicepresidente da Deputación da Coruña, impulsor do Estatuto do 36, membro do Partido Galeguista e das Irmandades da Fala.
