O Pazo de Raxoi acollerá o vindeiro luns, 19 de agosto, ás 13.00 horas, o acto institucional en recordo do alcalde republicano Ánxel Casal, en recoñecemento á súa memoria e á de todas as persoas que foron represaliadas xunto a el tras o golpe do 36.
Nesta homenaxe, que se realiza por segundo ano consecutivo no Salón Nobre de Raxoi, participarán representantes dos concellos de Santiago, de Teo e de Arzúa, “co obxectivo de visibilizar os lugares que marcaron os momentos finais da súa vida e da súa loita”. Están previstas intervencións da alcaldesa da capital galega, Goretti Sanmartín, do rexedor de Arzúa, Xoán Xesús Carril, e do edil de Teo Juan Jesús Cerqueiro.
Tal e como destacou o Concello de Santiago, este acto institucional ten por finalidade “honrar a dignidade colectiva das persoas que loitaron a favor da liberdade e da democracia e que foron represaliadas tras o golpe do 36”, e especialmente a figura de Ánxel Casal, asasinado o 19 de agosto dese mesmo ano en Cacheiras.
Ademais de ser alcalde de Santiago en 1936, Ánxel Casal tamén foi vicepresidente da Deputación da Coruña, impulsor do Estatuto do 36, membro do Partido Galeguista e integrante das Irmandades da Fala.
