O alcalde de Ames, Blas García, formalizou recentemente unha solicitude de reunión co Conselleiro de Sanidade, Antonio Gómez Caamaño, para abordar a ampliación e reordenación do centro de saúde de Bertamiráns. Este centro, que leva máis de 30 anos en funcionamento, atende a máis de 15.000 usuarios e funciona tamén como Punto de Atención Continuada (PAC). Segundo García, as instalacións “están obsoletas e xa non responden ás necesidades dun concello con máis de 33.000 habitantes”.
O rexedor destacou que a demanda de melloras non é nova. “Predecesores do actual conselleiro xa recibiran solicitudes similares”, lembrou García, facendo referencia a un escrito enviado o 19 de xaneiro de 2023 ao anterior responsable da Consellería de Sanidade, Julio García Comesaña. No seu momento, o goberno local puxo a disposición da Xunta os terreos anexos ao centro para facilitar a ampliación, oferta que segue en vigor.
O centro de saúde presenta problemas estruturais e de distribución de espazos, que xunto cun déficit de profesionais, contribúen a unha situación de colapso. Blas García enfatizou a importancia de actualizar as instalacións, dado que Ames “é o único concello de Galicia con saldo vexetativo positivo e un dos poucos que continúa medrando ano tras ano”. “A Xunta debería premiar aos concellos que logramos romper a tendencia demográfica negativa, proporcionando servizos que se adapten ás necesidades dunha poboación en crecemento”, concluíu García.
