O concelleiro do Partido Popular de Santiago Adrián Villa instou ao BNG a pór en marcha medidas na área recreativa Illa do Refuxio, situada no río Tambre e que une a parroquia compostelá de Barceila e o concello coruñés de Oroso, debido ao “total abandono e falta de limpeza”.
Despois dunha visita cos veciños a este enclave natural, tanto o edil como o seu compañeiro José Ramón de la Fuente lamentaron o estado dunha “zona privilexiada” de Compostela á que “tanta xente acode nestes meses do ano”, detallou de la Fuente, e na que se atopan ante un “escenario impropio da capital de Galicia”.
Así mesmo, Villa aproveitou para resaltar que na Illa do Refuxio pódese apreciar “quen cumpre e quen non”, debido a que o Concello de Oroso, gobernado polo Partido Popular, “ten todo limpo e co mobiliario en perfecto estado”, mentres que os nacionalistas santiagueses parece que “se esqueceron deste espazo”.
Segundo explicaron os populares nun comunicado, en pleno verán, momento de máis uso da illa, pódense ver “árbores caídas, falta de papeleiras, colectores de lixo cheos e sen recoller, así como a deterioración dos merendeiros”.
Nesta liña, aseguraron que esta é a proba do “pouco interese que ten o BNG en pór en valor o rural santiagués”, polo que instaron aos nacionalistas a solucionar esta conxuntura para que os veciños poidan gozar da área durante o que queda de verán.
“O BNG foi advertido na primavera pero, do mesmo xeito que co resto de asuntos, fixo caso omiso, o que denota unha falta de respecto aos veciños”, indicou Vila.
Así mesmo, José Ramón de la Fuente subliñou que Santiago non é unha cidade con moitos lugares como este e lamentou que non se puxo ” a punto” antes do verán para poder promocionalo e para que os veciños puidesen “gozar da natureza e da auga do Tambre”.
