O alcalde de Ames, Blas García, solicitou unha reunión co presidente da Xunta de Galicia, Alfonso Rueda, para abordar varios proxectos considerados vitais para o futuro do municipio. Entre estes proxectos destacan o enlace do polígono do Novo Milladoiro coa AG-56, a futura praza de Abastos, a depuradora de Sisalde, o polígono empresarial de Bertamiráns e a promoción de vivenda de protección pública.
García subliña a necesidade desta xuntanza para asegurar a cooperación entre a Xunta e o Concello nun mandato que considera “vital para o futuro do municipio”. Segundo o alcalde, “o concello maiano é un referente en Galicia, non só a nivel de crecemento demográfico e saldo vexetativo, senón tamén a nivel de calidade de vida da veciñanza e de oferta de servizos públicos”. Ademais, resaltou a importancia das empresas instaladas no termo municipal, moitas delas con relevancia estatal e internacional.
O alcalde explicou que “Ames necesita á Xunta de Galicia, pero a Xunta tamén necesita que Ames manteña o impulso que fai que sexa o único concello de Galicia con saldo vexetativo positivo e a media de idade máis baixa de entre todos os concellos galegos. O modelo de Ames funciona e é exportable a outros municipios”.
Entre os proxectos prioritarios está o enlace do polígono do Novo Milladoiro coa AG-56. O Concello de Ames estudou varias opcións, como habilitar un enlace desde a rotonda da N-550 no límite con Santiago ou abrir un novo enlace desde a Rocha ou Pardiñas. Outro estudo suxire a apertura dun enlace desde a AG-56 á altura da Rocha para conectar co polígono. “Tiñamos un compromiso co anterior presidente, gustaríanos que o actual cumpra con esta responsabilidade herdada”, afirmou García.
O proxecto do Mercado de Abastos de Ames, que se construirá na Casa de Barbazán en Bertamiráns, integrará doce postos e reorganizará o aparcamento para eventos no exterior. A Deputación da Coruña colaborará con 700.000 euros para materializar o proxecto. García destacou que “a Xunta de Galicia non pode quedar ao marxe”.
Outro proxecto é a ampliación da depuradora de Sisalde, que está sobrepasada en capacidade, atendendo arredor de 14.000 usuarios adicionais á súa capacidade máxima. “Esperamos que este compromiso herdado non sexa esquecido”, subliñou o alcalde.
O polígono empresarial de Bertamiráns tamén é unha prioridade, con 50.000 metros cadrados contemplados no PXOM que se pretenden elevar ata os 200.000. Varias empresas solicitaron información sobre a dispoñibilidade de terreo e prazos para a construción desta área empresarial.
Finalmente, a promoción de vivenda de protección pública é central nas políticas do mandato 2023-2027. O alcalde recordou que “a vivenda é un punto clave do mandato e que xa está traballando xunto co IGVS para a creación de máis de 200 vivendas de protección pública no Milladoiro”.
