O campo do río de Ponte Ledesma acolleu na noite de onte a oitava edición da Noite Velada, un evento organizado polo Concello de Boqueixón que contou cunha gran acollida entre os veciños e veciñas da zona. A música tradicional resoou aos pés da histórica ponte e ás beiras do río Ulla, iluminados por máis de 300 candeas e 50 teas, creando un ambiente case máxico.
O alcalde de Boqueixón, Ovidio Rodeiro, explicou que “o noso obxectivo é facer unha festa de exaltación da nosa tradición e da nosa cultura. Por unha banda, grazas á música tradicional das nosas agrupacións locais e, por outra, ao dispoñer do mellor escenario posible: o campo do río de Ponte Ledesma, un dos espazos máis importantes da comarca a nivel natural, patrimonial, cultural e histórico”.
Este ano, a música correu a cargo dos grupos locais Muxicas da Silveira e Raeira, pechando a noite o grupo Cantos da Terra. Este último, formado por cinco músicos galegos excompoñentes de coñecidos grupos folclóricos, ofreceu unha selección dos éxitos máis coñecidos do cancioneiro popular galego tradicional. A súa actuación animou a moitas das persoas presentes a cantar e bailar, facendo da noite unha celebración inesquecible.
RECREACIÓN HISTÓRICA
O mesmo escenario do campo do río de Ponte Ledesma acollerá mañá, domingo 4 de agosto, ás 20:00 horas, unha recreación da histórica Batalla de Ponte Ledesma, que enfrontou en marzo de 1809 á veciñanza liderada pola Xunta de Trasdeza contra as tropas napoleónicas, saldándose cunha vitoria veciñal.
Nesta recreación participarán veciños e veciñas de Boqueixón, así como membros da Asociación Cultural Heroes de Casaldeirigo (Valga), todos dirixidos polo actor Suso Martínez e o músico Manoele de Felisa. A asistencia ao evento é libre e de balde.
Ese mesmo domingo, pola mañá, o campo da feira de Lestedo acollerá unha nova edición do seu tradicional mercado, que contará coa presenza de catro food trucks da campaña “Galicia sabe a mar”. De 9:30 a 15:00 horas, as persoas que se acheguen poderán degustar petiscos únicos ideados especialmente para esta iniciativa e elaborados con produtos autóctonos certificados de mar e terra.
