A Comisión Especial de Transporte Público en Vehículos de Turismo (CEVT) do Consello Galego de Transportes celebrou este martes unha reunión clave na que se analizou a solicitude do Concello de Santiago para ampliar o número de licenzas de taxi na cidade. A directora xeral de Mobilidade da Xunta, Judit Fontela, e o concelleiro de Mobilidade de Santiago, Xan Duro, participaron activamente no encontro, onde se elaborou un informe non vinculante que será enviado ao Concello para completar a súa solicitude.
A proposta actual do Concello contempla un incremento de 29 novas licenzas, das cales a metade estarían destinadas a persoas con mobilidade reducida. A solicitude basease na cota establecida pola Lei de Transporte Público en vehículos de turismo de Galicia, que determina unha licenza por cada 1.000 habitantes, criterio que Santiago xa supera.
A CEVT, composta por representantes do Consello Galego de Transportes, a Federación Galega de Municipios e Provincias (Fegamp), o Consello Galego de Consumidores e Usuarios, o Comité Español de Representantes de Persoas con Discapacidade (Cermi), e varias organizacións sindicais, valorou positivamente as aportacións feitas.
Xan Duro resaltou a “boa sintonía” da reunión, mencionando a crecente demanda de servizos de taxi na cidade, que rexistrou un aumento do 62% nas viaxes entre 2016 e 2022, excluíndo os anos da pandemia. Este crecemento xustifica, segundo o edil, a necesidade de ampliar as licenzas para aliviar a presión sobre este servizo.
Agora, o Concello deberá aclarar algúns datos adicionais sobre o nivel de servizos nocturnos solicitados pola Dirección Xeral de Mobilidade, co obxectivo de elevar un informe definitivo para a súa posterior avaliación e decisión por parte da Xunta. Xan Duro tamén destacou que a solicitude considera a “poboación vinculada” á cidade, o que inclúe a persoas que manteñen relacións laborais, educativas ou turísticas con Santiago.
