A capital galega prepárase para un 25 de xullo, Día Nacional de Galicia, que contará un ano máis coa tradicional Ofrenda ao Apóstolo e coa Alba de Compostela, o acto institucional que organiza o Concello de Santiago e que, nesta ocasión, celebrarase ás 19:30 horas e non coincidirá coa Ofrenda, como cerimonias principais.
A partir das 10:30 horas, o arcebispo de Santiago, Francisco José Prieto Fernández, presidirá a Misa Solemne e a Ofrenda Nacional. Tras o pase de revista das tropas, iniciarase a procesión do Padroado antes da Eucaristía na Catedral. Para concluír, haberá unha recepción no Pazo de Raxoi.
A Ofrenda ao Apóstolo Santiago foi instituida en 1643 por Felipe IV e, ao longo dos anos, mantívose a tradición de que reis, xefes de Estado ou personalidades coas máis altas responsabilidades rendan homenaxe ao Patrón das Españas para pedir a súa intercesión en asuntos de actualidade ou de preocupación colectiva.
Está previsto que a alcaldesa de Santiago, Goretti Sanmartín, só participe nos actos institucionais na Praza do Obradoiro e na recepción no Pazo de Raxoi, así como na Ofrenda a Rosalía e na Alba de Compostela. O ano pasado, a rexedora xa tomou a decisión de non acudir á Ofrenda ao Apóstolo argumentando que “como representante da cidade e atendendo á condición de estado laico” a súa participación só centraríase nos actos institucionais.
ALBA DE COMPOSTELA
Ademais, por segundo ano consecutivo, a cerimonia institucional do Concello será a ‘Alba de Compostela’, creado o ano pasado polo Goberno local para “homenaxear ás persoas ou institucións que constrúen Compostela todo o ano” e que foi criticado polos partidos da oposición por coincidir coa Ofrenda ao Apóstolo.
Con todo, nesta ocasión, o evento celebrarase ás 19:30 horas e non coincidirá coa Ofrenda. A localización si será a mesma: o Teatro Principal. Os homenaxeados, tal e como decidiu o Consello Asesor de Condecoracións do Concello por unanimidade, serán a presidenta do Padroado do Museo do Pobo Galego, Concha Losada; o comerciante Xaquín Mato; a catedrática en Farmacoloxía Mabel Louza; e o presidente do Foro Galego de Inmigración, Miguel Fernández.
A ‘Alba de Compostela’ inspírase no coñecido discurso ‘Alba de Gloria’ que Castelao fixo en Buenos Aires o 25 de xullo de 1948, onde fai un retrato de personaxes históricos que desde a Idade Media contribuíron a construír a identidade e a presenza no mundo de Santiago e de Galicia e no que formula un desexo de esperanza no futuro.
