As Festas do Apóstolo de Santiago de Compostela arrincarán o vindeiro venres, 19 de xullo, cunha gran celebración que comezará ás 20.30 horas cunha “foliada pregoeira” na Praza do Obradoiro. O evento culminará ás 21.30 horas co pregón desde o balcón do Pazo de Raxoi, a cargo da recoñecida chef Lucía Freitas, quen posúe unha Estrela Michelín e dous Soles Repsol.
Lucía Freitas expresou o seu agradecemento pola invitación a dar o pregón, unha oportunidade que valora para “poder falar desde o corazón” sobre Santiago de Compostela, cidade que describe como “a mellor do mundo”.
Pola súa parte, a alcaldesa Goretti Sanmartín destacou a filosofía culinaria de Freitas, que conxuga a vangarda coa tradición, e a concelleira de Festas, Pilar Lueiro, invitou a todos os cidadáns a participar activamente na foliada e a “encher a praza de bailadores”, co fin de dinamizar este evento inaugural e destacado das festas da capital galega.
