A conselleira de Medio Rural, María José Gómez, acompañada pola alcaldesa do concello de Teo, Lucía Calvo, visitou esta localidade e alí destacou o investimento do Plan de mellora de camiños rurais, dotado con case 19,5 millóns de euros para 2024 e 2025, “o que supón o orzamento máis alto desde 2017”.
En concreto, e segundo explican nun comunicado, no marco desta convocatoria, está prevista unha actuación no concello de Teo. O financiamento faise con fondos Feader, con cargo ao Plan Estratéxico da PAC 2023-2027 e son subvencionables camiños de acceso a núcleos rurais de poboación.
O obxectivo desta iniciativa é mellorar as condicións de vida e traballo no medio rural xa que o fortalecemento das infraestruturas facilita a accesibilidade e vertebración do territorio, reforza o tecido social, contribúe a mellorar a capacidade organizativa das áreas rurais, dinamiza o tecido produtivo e fixa a poboación.
Nesta liña, o plan permite garantir e potenciar o tránsito de vehículos e maquinaria. Durante o período 2016-2024 contou cunha dotación orzamentaria de máis de 130 millóns de euros, permitindo a mellora de máis de 5.450 camiños e máis de 4.280 quilómetros de vías rurais.
