Segundo informaron nesta mañá aos medios de comunicación, a Asemblea Aberta por Palestina, que participara a pasada semana nun encerro no Pazo de San Xerome e na Facultade de Xeografía e Historia da USC, antes de que fosen desaloxados pola Policía, acaba de entrar na Xerencia da USC, na Casa da Balconada situada na rúa Nova.
A súa intención, segundo indicaron, é permanecer no edificio nunha “xornada de portas abertas”. Varias persoas membros da Asemblea están situados no vestíbulo do edificio facendo divulgación sobre as súas demandas hacia a USC. A presenza policial xa se fixo ver esta mañá nas portas do edificio, segundo varias testemuñas da zona.
Entre as demandas que sinalan no manifesto que expoñen na entrada están o posicionamento polo “alto ao fogo inmediato e permanente”, a defensa pública dos “dereitos do pobo palestino”, cortar a relacións coas empresas implicadas no conflito entre Israel e Palestina, entre as que citan varias universidades, ou “reprobar, por principios éticos, toda colaboración académica individual” con estas institucións. Citan ademais empresa como HP, Siemens, Amazon ou o Banco Santander entre as que, segundo eles “violan o dereito ao pobo palestino” e que a USC está a financiar.
Segundo indicaron nun comunicado, o seu obxectivo “segue a ser o mesmo: deter a vergoñenta colaboración da Universidade co xenocidio perpetrado por Israel“. Aseguran que a USC “segue negándose a dialogar” e “ignorando as 16 demandas”.
“A USC négase a permitir a nosa participación plena na comisión, nin acepta a inclusión de persoas palestinas e técnicas alleas á Universidade”, declaran dende a Asemblea, quen tamén aseguran que aceptaron asistir a dúas “reunións simbólicas” e que indican que foron “unha mera formalidade sen intención real de diálogo”.
“Na primeira reunión (venres 14), botóusenos da mesma despois de expoñer as nosas propostas e argumentos sen posibilidade de escoitar unha resposta ou debatir nada. Na segunda, onte mesmo, negóusenos novamente unha resposta ás nosas propostas e a comisión limitouse a informarnos das accións que decidiron unilateralmente e que pouco teñen que ver coas nosas demandas”, denuncian.
