O secretario xeral do PSOE compostelán, Aitor Bouza, esixiu á alcaldesa, a nacionalista Goretti Sanmartín, a posta en marcha dunha comisión de seguimento do grao de execución dos orzamentos municipais, despois de facilitar a súa aprobación co acordo asinado a finais do pasado ano.
O dirixente socialista remitiulle o mércores unha carta á rexedora na que pide a creación deste órgano, que estaría configurado pola parte socialista pola comisión negociadora dos propios orzamentos, da que formaron parte o propio Bouza, así como o portavoz municipal Gonzalo Muíños; a vicepresidenta xeral, Marta Álvarez Santullano e a edil Marta Abal. O secretario xeral do PSOE compostelán trasladou a súa preocupación o estado dos proxectos que viñan do mandato socialista e que dependen de fondos europeos que “poderían perderse se non se impulsa a súa execución“.
Exemplo disto, conforme indicou, son o proxecto de renaturalización Entre Sar e Sarela, que contempla actuación varias na lagoa do Auditorio, a lagoa de Cornes ou o xardín botánico: “Hai proxectos que non se están pondo encima da mesa e non están a ir a velocidade suficiente”, sinalou. Neste sentido, o socialista sostivo que, pasados seis meses, “é o momento de esixir unha rendición de contas“. “Estamos a metade de ano, consideramos que fomos responsables á hora de empezar a esixir o cumprimento efectivo deste acordo”, indicou.
