O ranking QS World University Rankings 2025 volveu a incluír á Universidade de Santiago de Compostela (USC) entre as mellores universidades do mundo, situándoa no posto 651-660 tras avaliar un total de 5.663 institucións de 106 localizacións, 35 delas en España.
Diso informou a USC nun comunicado, no que lembra que na pasada edición estaba no rango 701-710. En concreto, destaca de novo nos ámbitos correspondentes á participación en redes internacionais de investigación, reputación académica e sustentabilidade.
Para a elaboración desta lista, a puntuación confórmase medindo a reputación a través de sondaxes e dunha serie de indicadores oficiais que conforman unha metodoloxía que sitúa este ranking entre os máis fiables.
Entre as 35 universidades do Estado avaliadas, a de Santiago de Compostela destaca no número de citacións do seu persoal investigador, na reputación académica, nas redes internacionais de investigación e na taxa de empregabilidade.
