O vindeiro luns, 3 de xuño, o Ateneo de Santiago, en colaboración coa Real Academia Galega de Ciencias, ofrecerá unha conferencia titulada ‘José Rodríguez. O primeiro gran científico galego‘, centrada na figura do coñecido como Matemático Rodríguez, elixido pola RAGC como Científico Galego do ano 2024, coincidindo co bicentenario do seu falecemento.
A charla, que terá lugar ás 19:30 na sede de Afundación, sita na rúa do Vilar, será impartida por Carmen Villanueva, doutora en Física Aplicada e investigadora desta figura, sobre a cal versou a súa tese doutoral.
Carmen Villanueva Pérez é licenciada en Química pola Universidade de Santiago de Compostela e doutora en Física Aplicada pola Universidade de Vigo. Foi profesora de Ensino Secundario e realizou a súa tese doutoral sobre José Rodríguez, a cal foi presentada en decembro do pasado ano 2023.
