O proxecto EspazoCoop Emprende asesorará a posta en marcha de 120 cooperativas ata 2029, unha vintena por ano, o que suporá que preto de 200 persoas desempregadas poidan atopar traballo.
Este mércores, a Unión de Cooperativas Galegas EspazoCoop presentou en Santiago esta iniciativa que recibirá máis de medio millón de euros da UE a través do Fondo Social Europeo Plus no período 2023-2029, a través do organismo Confederación Empresarial Española da Economía Social (Cepes) –no marco do Programa de Emprego, Formación, Educación e Economía Social (Efeso)–.
A directora xerente de EspazoCoop, Lucía Mendoza, explicou que o obxectivo que se persegue é o de creación de emprego. Para iso, márcanse metas como a participación de 360 persoas desempregadas durante os anos de vixencia do proxecto (2023-2029), das cales se prevé que 192 consigan traballo tras a súa participación.
Os colectivos destinatarios principais son as persoas desempregadas, sobre todo de longa duración, pero tamén está dirixido a aquelas persoas con emprego por conta propia como allea e os que queiran transformar o seu modelo de negocio.
PROXECTO
Esta iniciativa ten como obxectivo aumentar as competencias emprendedoras e incrementar o número de compañías e iniciativas de autoemprego colectivo creadas baixo fórmulas de economía social, así como sentar as bases para a súa supervivencia a través de servizos de apoio e asesoramento ao emprendimiento. A Unión de Cooperativas Espazocoop é unha entidade multisectorial de carácter empresarial, configurada como asociación sen ánimo de lucro, de ámbito galego, integrada por cooperativas de distintas clases.
Entre outras cuestións, hai itinerarios personalizados e formación tamén para axudar a estabilizar empresas e facer que sexan viables, do mesmo xeito que se apoia na tramitación de axudas ou en materia fiscal.
