O candidato número 8 do PP ao Parlamento Europeo, Francisco Millán Mon, destacou como europeos os valores de “reconciliación, esperanza e solidariedade” que representa o Camiño de Santiago: “Europa nace e constrúese peregrinando”.
Estas declaracións tiveron lugar este martes durante unha visita ao albergue Virxe Peregrina, en Pontevedra, onde estivo acompañado polo presidente local do partido, Rafa Domínguez.
Desde ese lugar, Millán Mon reafirmou o seu compromiso cunha Europa “comprometida coa paz, que creza, que cree emprego, crecemento e prosperidade”, como defende o PP, ao que considerou “o maior grupo da Eurocámara” e “a forza tractora dunha Europa con máis protagonismo no mundo”.
Neste contexto, o número 8 da lista popular solicitou o voto nas eleccións do 9 de xuño, non só para que Galicia obteña o financiamento comunitario necesario, senón tamén para que “Europa vixíe o Estado de Dereito” en España.
Pola súa banda, o presidente do PP na cidade de Pontevedra lembrou que o Camiño Portugués é o que máis crece en toda Galicia e o que “máis se preocupa” por un turismo sustentable, afastado das masificacións doutros territorios.
Por iso, destacou o albergue Virxe Peregrina como “exemplo perfecto” do “compromiso” do seu partido coas instalacións públicas relacionadas coas rutas xacobeas.
