Este sábado 25 de maio, ás 19:30 horas, o Salón de Actos da Casa da Cultura de Verín acollerá a presentación da viaxe en moto que realizará o verinés Oscar Conde dende Santiago de Compostela (pasando por Verín) a Katmandú. Esta emocionante aventura comezará o vindeiro mes de setembro e prolongarase ata novembro de 2024, percorrendo máis de 17.000 quilómetros.
“O libro de ruta levará a Oscar a cruzar países por Europa e Asia, incluíndo Italia, Croacia, Montenegro, Albania, Macedonia, Grecia, Irán, Paquistán, India e Nepal, ao longo de seis semanas de viaxe”, sinalan dende o Concello de Verín.
Durante a presentación, proxectarase o documental sobre a viaxe á estrada máis alta do mundo, KHARDUNG LA PASS en India, situada a 5.600 metros de altura, realizada no ano 2019; e ao rematar a mesma, os invitados Miguel Ángel Prieto (“Frai Chitín”) e Carlos Damorín, presentarán a gala solidaria “Gala Entroideira por Nepal”, que terá lugar no Auditorio Municipal o día 29 de xuño. Neste evento proxectarase a película “Frai Chitín e o Triángulo Máxico”, entre outras moitas sorpresas.
SOLIDARIDADE CO NEPAL
A recadación íntegra da gala será doada á ONG española “Abrazando Nepal” (https://huggingnepal.org/), fundada por voluntarios no ano 2015 despois do terremoto de 7,9 graos que devastou o país. Na actualidade, a súa actividade principal é proporcionar comidas diariamente a persoas sen recursos en Katmandú. A ONG está formada integramente por voluntarios.
