O que comezou co propósito de reunir unha tonelada de axuda humanitaria acabou convertido nun envío de 14,2 toneladas de material sanitario, alimentos, roupa e equipos de rescate desde Galicia a Venezuela. A iniciativa cidadá “Objetivo 1 Tonelada” completou o traslado de case 1.500 caixas en tres voos internacionais, tras meses de traballo voluntario para recoller, clasificar e preparar as doazóns destinadas á poboación afectada polos terremotos do pasado mes de xuño.
Segundo informou a Fundación Araguaney nun comunicado, a campaña foi promovida por Christian Daniel Lucas de Carvalho, José Manuel Magán Bastida, Manuel Rodríguez Pimentel e Jeysel Magán Bastida. A resposta solidaria permitiu multiplicar por 14,2 o obxectivo inicial e contou coa colaboración da propia fundación, a Xunta, LASER Airlines C.La., a produtora audiovisual CTV e a Embaixada de Venezuela en Madrid.
Todo o material chegou xa a Caracas, onde foi recibido pola Irmandade Galega de Venezuela, entidade que coordinará a súa distribución. Antes da saída, a axuda foi recollida, clasificada e preparada no Plató 1.100 de CTV, en Teo, desde onde se organizou o envío.
A Fundación Araguaney coordinou a operación loxística, centralizando a comunicación entre as entidades participantes, as reunións e as xestións necesarias para facer posible o traslado. Pola súa banda, a colaboración da Xunta articularase mediante un convenio coa Consellería de Presidencia dotado con 12.000 euros, destinados a afrontar os gastos loxísticos de preparación e canalización da axuda.
A compañía LASER Airlines C.La. asumiu integramente o custo dos voos transatlánticos, completando a ponte aérea para transportar as doazóns desde Galicia. A Embaixada de Venezuela en Madrid colaborou na catalogación da carga e na súa tramitación como axuda humanitaria, ademais de prestar apoio diplomático á operación.
O cargamento inclúe material sanitario e hospitalario de emerxencia, como gasas, suturas, xel hidroalcohólico, máscaras, luvas, alcohol, auga osixenada, vías e sondas urinarias, ademais de medicamentos de primeira necesidade. A estes produtos súmanse alimentos non perecedoiros e infantís, roupa, calzado e comida para animais, así como equipos de rescate e traballo compostos por cascos, botas, cordas de alta resistencia e lanternas.
En Venezuela, a Irmandade Galega canalizará as subministracións cara ao Hospital Clínico Universitario de Caracas, o Hospital Infantil J. M. de los Ríos e os hospitais Domingo Luciani e Vargas. Tamén se destinará axuda aos centros de recollida da Universidade Central de Venezuela e da Universidade Católica Andrés Bello.
A campaña tivo, ademais, unha vertente solidaria en Galicia. As doazóns que non cumprían os requisitos para o transporte aéreo ou non se axustaban ás necesidades da zona afectada entregáronse a Cáritas para apoiar familias en situación de vulnerabilidade na comunidade. Entre ese material figuraban auga potable, alimentos en recipientes de vidro e roupa de inverno pouco axeitada para o clima costeiro do destino.
