O parque de Belvís converterase o vindeiro venres 2 de outubro nun espazo para a música e a gastronomía coa celebración do PicaFest, unha nova proposta promovida pola Concellaría de Xuventude de Santiago a partir dos Orzamentos Participativos Compostela Decide. O festival comezará ás 18:30, terá acceso libre e gratuíto e contará coa actuación de cinco formacións galegas vinculadas a diferentes estilos musicais.
A iniciativa reúne dúas das propostas apoiadas pola mocidade compostelá dentro do proceso participativo municipal, ambas relacionadas coa organización de actividades que combinasen música e gastronomía. A concelleira de Dereitos e Servizos Sociais, Promoción Económica e Xuventude, María Rozas, presentou este venres a programación xunto ao presidente de Hostalaría.gal, Lois Lopes, entidade que colaborará na vertente gastronómica.
Segundo explicou Rozas, a intención é ofrecer un espazo de encontro para a mocidade e, ao mesmo tempo, facilitar a difusión de artistas que están iniciando ou consolidando os seus proxectos. A concelleira sinalou que a cita funcionará como “un escaparate para o talento mozo de Galicia” e permitirá que algunhas das bandas vinculadas ao Centro Xove da Almáciga poidan actuar diante dun público máis amplo.
Tres das cinco propostas musicais do cartel manteñen precisamente relación co Centro Xove. Lubela levará a Belvís unha combinación de violoncello e acordeón na que incorpora elementos da música tradicional galega e do folclore dos Balcáns, mentres que Kafé de Pota ofrecerá unha proposta de carácter festivo con referencias a formacións como Herdeiros da Crus ou Terbutalina. Tamén participará a cantante de música urbana Queen Rendi.
O programa completarase con Unto Vello, proxecto de Bieito Pereira e Xabi Gómez que parte da música tradicional para construír un espectáculo orientado ao baile, e con Tapa D’Orella, formado por Willow GHZ e Pappaquino. Estes dous artistas, procedentes das escenas urbana e electrónica, mesturan na súa nova proposta elementos de música latina, ritmos galegos, ska e sons vinculados ás verbenas, cunha presenza tamén do humor nos seus directos.
A outra parte central do PicaFest será a comida. Hostalaría.gal encargarase da colaboración gastronómica seguindo o contido das propostas que obtiveron apoio nos Orzamentos Participativos, que incluían unha churrascada e hamburguesas. Lois Lopes indicou que se empregarán “ingredientes de calidade e produtos de proximidade” tanto para o churrasco como para a elaboración das hamburguesas.
O presidente da asociación hostaleira destacou ademais a presenza da gastronomía entre as preferencias expresadas pola xente nova no proceso participativo. “O feito de que os mozos e mozas aposten por iniciativas gastronómicas nos orzamentos participativos demostra que a comida é parte da nosa cultura e da nosa maneira de entender a vida”, afirmou durante a presentación.
As persoas de entre 14 e 30 anos poderán acceder a un menú por 5 euros mediante un sistema de bonos. Estes poderán descargarse a través do código QR incluído no cartel do festival e haberá un total de 300 bonos dispoñibles, cun máximo de cinco por persoa. Para o resto do público, a oferta gastronómica manterá prezos adaptados aos de mercado.
O PicaFest pecha así parte da programación nacida da última edición dos Orzamentos Participativos Compostela Decide da área de Xuventude. No proceso participaron 1.500 mozos e mozas, que votaron diferentes iniciativas relacionadas principalmente co deporte, o cinema, a cultura urbana e a gastronomía.
A proposta máis apoiada foi a colocación dunha pantalla xigante para seguir o Mundial de fútbol, mentres que o segundo posto correspondeu ao cinema ao aire libre desenvolvido na Alameda. A terceira e a cuarta opción estiveron relacionadas coa cultura urbana e materializáronse durante a pasada fin de semana dentro do Compostela Street. As iniciativas que ocuparon o quinto e o sexto posto, centradas na combinación entre música e comida, son as que agora conflúen no PicaFest.
A Concellaría de Xuventude reserva 100.000 euros para executar as actividades seleccionadas a través dos Orzamentos Participativos.
