O Ateneo de Santiago dedicará os próximos días á figura do xornalista compostelán Alfredo Vicenti, coincidindo co 110 aniversario do seu pasamento. A entidade programou diferentes iniciativas para recuperar a súa traxectoria profesional e a súa vinculación coa cidade, entre elas a presentación en galego dunha obra biográfica e un acto na Facultade de Ciencias da Comunicación da USC.
A primeira cita terá lugar o luns 28 de setembro ás 19:30, na sede de Afundación, na Rúa do Vilar, 29, coa presentación da tradución ao galego de ‘Alfredo Vicenti. Vida e obra dun gran xornalista’, escrita por Baldomero Cores Trasmonte. No encontro participarán o presidente da entidade, Francisco Candela; o secretario xeral da Lingua, Valentín García; o exdecano da Facultade de Ciencias da Comunicación da USC Xosé Ramón Pousa; a presidenta da Asociación de Periodistas de Santiago de Compostela, Xulia Campo Vázquez, e Juan Carlos Cores, fillo do autor. Ao finalizar o acto, cada persoa asistente recibirá un exemplar da publicación.
Os actos continuarán o mércores 30 de setembro ás 10:00 na Facultade de Ciencias da Comunicación da Universidade de Santiago de Compostela, que acollerá unha nova homenaxe dedicada á figura e ao legado profesional do xornalista. A programación pretende achegar a súa obra ás novas xeracións e lembrar o papel que desempeñou na prensa española entre finais do século XIX e comezos do XX.
A conmemoración completarase coa colocación dunha placa na casa natal de Vicenti, situada na Rúa Virxe da Cerca, 13. O Ateneo solicitou esta actuación ao Concello de Santiago en novembro de 2025 e, tras recibir a autorización, será o propio Consistorio o encargado de fixar e anunciar a data do acto de colocación.
Nado en Santiago, Alfredo Vicenti desenvolveu unha carreira que combinou xornalismo, medicina, literatura e política. Os seus primeiros pasos na prensa estiveron ligados a El Diario de Santiago, antes de asumir responsabilidades de dirección en cabeceiras como La Ilustración Cantábrica, El Globo e El Liberal.
Vicenti participou ademais no impulso da Asociación da Prensa de Madrid e alcanzou unha posición destacada no xornalismo da súa época. A súa traxectoria levouno a ser definido como “mestre de mestres”, unha consideración que forma parte do legado profesional que o Ateneo de Santiago busca recuperar coa programación deste aniversario.
