A Praza da Oliveira, situada na zona vella de Santiago de Compostela, pasa a chamarse ‘Praza da Oliveira-Pilar Pereira’, co obxectivo de que a actriz e dramaturga compostelá permaneza “na memoria colectiva dos veciños”.
Veciña da rúa da Troia, “sempre presumiu de ser picheleira aquí e en todos os lugares de fóra onde traballou e viviu durante diferentes momentos da súa vida”, tal e como destacou a alcaldesa, Goretti Sanmartín.
Así, o Concello sinalou que elixiu esta praza para darlle o nome de Pilar Pereira para incrementar a presenza das mulleres nos nomes do rueiro e para optar por espazos centrais da cidade para dar visibilidade e recoñecemento.
Para a rexedora, Pilar Pereira foi unha muller que “quixo exercer a súa vida en liberdade, nunha época na que as mulleres non o tiñan nada fácil, unha pioneira que reivindicou a creación artística desde a mocidade ata os últimos anos”.
