Santiago de Compostela acollerá o próximo 29 de novembro o partido entre a Selección Española Masculina de Baloncesto e Grecia, correspondente á fase de clasificación para o Mundial de Qatar de 2027. O encontro disputarase no Multiusos Fontes do Sar co apoio de Turismo de Galicia, que enmarca a celebración da cita deportiva nas accións previas ao Xacobeo 2027.
O partido formará parte da quinta xanela da fase de clasificación para o campionato mundialista. A selección española afrontará primeiro un encontro a domicilio ante Montenegro o xoves 26 de novembro e, tres días despois, recibirá ao combinado grego na capital galega, nun dos compromisos sinalados dentro desta fase clasificatoria.
Desde Turismo de Galicia destacan a relevancia da celebración de eventos deportivos para atraer visitantes e xerar actividade turística. Neste caso, o organismo autonómico considera que un partido internacional destas características pode servir tamén como escaparate de Santiago e de Galicia entre públicos de fóra do territorio, especialmente ao tratarse dun encontro entre dúas seleccións nacionais.
A chegada do combinado español a Compostela suporá tamén o seu regreso a Galicia dous anos despois da última visita. O precedente máis recente produciuse en novembro de 2024, cando a selección masculina disputou en Ourense un encontro fronte a Eslovaquia.
O duelo contra Grecia será, ademais, a cuarta ocasión na que a Selección Masculina xogue en Santiago de Compostela, aínda que será a primeira vez que o faga nun partido oficial. As tres visitas anteriores corresponderon a encontros amigables: en 1983 xogou na cidade contra Panamá e contra a URSS, mentres que en 2013 se enfrontou a Macedonia.
