A CIG-Xustiza denunciou unha situación de “saturación estrutural” no equipo de Civil e Familia do Servizo Común de Execución de Santiago de Compostela e reclamou a cobertura inmediata das cinco prazas que, segundo os seus datos, permanecen vacantes. O sindicato vincula os atrasos e o volume de expedientes pendentes cunha falta de persoal que considera prolongada no tempo.
A sección sindical elaborou un informe sobre a situación deste servizo no que desvincula os problemas da posta en marcha da nova Oficina Xudicial, cuxa implantación en Santiago quedou completada o 31 de decembro de 2025. Para a organización, a situación actual “non é consecuencia da recente implantación da nova Oficina Xudicial”, senón que responde a “un déficit de persoal sostido no tempo”.
Os datos recompilados pola CIG apuntan a un incremento continuado da actividade nos últimos exercicios. As sentenzas vinculadas ao equipo pasaron de 1.527 en 2023 a 2.180 en 2024, o que representa unha subida do 42,7%. En 2025 alcanzáronse as 2.490 resolucións, de maneira que o aumento acumulado respecto de 2023 ascende ao 63,1%.
Ao mesmo tempo, o sindicato sinala que o equipo de Civil debería contar cun cadro de 17 persoas, cinco xestores e doce tramitadores, pero actualmente dispón de doce efectivos. Permanecen sen cubrir dúas prazas de xestión e tres de tramitación.
“Catro destas prazas levan meses sen cubrir. Isto significa que o equipo está a funcionar co 70,6% do cadro previsto, polo que a falta de persoal non pode considerarse unha ausencia puntual ou marxinal”, indica a CIG-Xustiza.
A organización sindical engade que dous dos tramitadores que están actualmente en activo traballan especificamente na área de Familia, polo que non se dedican á execución civil xeral. Se se exclúen estes postos do cálculo, a CIG estima que son dez as persoas que asumen de maneira efectiva este último ámbito.
O informe calcula que cada traballador destinado á execución civil xeral está asumindo unha media de 230 execucións correspondentes unicamente aos anos 2024 e 2025. Cun cadro completo, esa ratio quedaría en 153 expedientes por profesional.
No caso dos escritos pendentes, a media actual sitúase en 166 por persoa, fronte aos 110 que resultarían de repartir o traballo entre todos os postos previstos. A CIG cifra así a sobrecarga nun 50% nas execucións e nun 51% nos escritos.
O sindicato matiza que estas cantidades non reflicten todo o volume de asuntos que permanecen abertos nos xulgados composteláns. “A execución civil arrastra procedementos de anos e mesmo décadas anteriores que non están incluídos nestes datos, polo que o volume real de pendencia é superior”, advirte.
Entre os indicadores utilizados no informe figura tamén a evolución das execucións de títulos xudiciais (ETX). Pasaron de 1.556 expedientes en 2024 a 1.803 en 2025, un incremento do 15,9%.
As execucións que continúan en tramitación e que corresponden só a eses dous exercicios ascenden xa a 2.300, segundo a CIG. A elas súmanse 1.655 escritos pendentes de prover, dos cales 700 están concentrados na praza 5.
A central sindical lembra ademais que estes datos non contabilizan outros procedementos que tamén corresponden á sección e que presentan, segundo destaca, unha maior dificultade técnica. Entre eles están as execucións de títulos non xudiciais (ENX) e as execucións xudiciais hipotecarias (EXH).
A CIG ALERTA DAS CONSECUENCIAS PARA AS PERSOAS AFECTADAS
A denuncia sindical incide tamén nas consecuencias que poden ter os atrasos fóra da propia organización interna dos órganos xudiciais. A CIG sostén que a execución das resolucións é a fase que permite materializar os dereitos recoñecidos previamente nunha sentenza.
Neste sentido, a organización considera que unha demora excesiva pode afectar ao dereito á tutela xudicial efectiva, ao impedir que as decisións dos tribunais se cumpran nun prazo razoable.
O sindicato cita entre os asuntos que poden verse afectados pola acumulación de expedientes as pensións de alimentos, procedementos relacionados con vítimas de violencia de xénero, reclamacións de rendas e débedas por cotas de comunidades de propietarios, entre outros.
“A demora da Administración vulnera o dereito á tutela xudicial efectiva ao non garantir o cumprimento das sentenzas e demais resolucións xudiciais nun prazo razoable”, sostén a CIG no seu informe.
PETICIÓN DE PERSOAL INTERINO E DUN PLAN ESPECÍFICO
Ante estes datos, CIG-Xustiza reclama que se cubran de maneira inmediata as cinco vacantes existentes mediante persoal interino xa formado, empregando para iso as listas que están actualmente en vigor e sen agardar á publicación dunha nova bolsa.
A organización pide igualmente que as prazas sexan cubertas con carácter definitivo cando o permitan os correspondentes procesos de provisión, así como a posta en marcha dun plan específico de actuación para o equipo de Execución Civil de Santiago.
Entre as súas peticións figura tamén que se fagan públicas as cifras de persoal desagregadas por xurisdición e sección, co obxectivo de coñecer como se distribúen os efectivos nos distintos ámbitos da Administración de Xustiza.
