O Tribunal de Instancia de Santiago de Compostela puxo en marcha a execución da sentenza polo accidente ferroviario de Angrois, ocorrido en xullo de 2013 e no que morreron 80 persoas. A decisión prodúcese despois de que a resolución xudicial fose declarada firme e inclúe actuacións tanto sobre a pena imposta ao maquinista como sobre as cantidades económicas que aínda deben percibir as persoas prexudicadas.
Nun auto ditado pola maxistrada da praza 2 da Sección Penal do Tribunal de Instancia compostelán, do que informou o Tribunal Superior de Xustiza de Galicia (TSXG), ordénase iniciar as dilixencias necesarias para facer efectivos os pronunciamentos establecidos na sentenza.
A xuíza sinala que “procede levar a efecto os pronunciamentos contidos na sentenza na forma e no tempo prescritos no Código Penal e nos regulamentos, acordando a práctica das dilixencias necesarias”.
Unha das cuestións que deberá resolverse nesta fase afecta á pena de prisión do maquinista, condenado a dous anos e seis meses de cárcere como autor de 79 delitos de homicidio e 143 delitos de lesións, todos eles cometidos por imprudencia grave.
A maxistrada acordou dar traslado á súa representación procesual para que se manifeste sobre a posibilidade de suspender o cumprimento da pena, tendo en conta que existe unha solicitude de indulto actualmente en tramitación. O auto fai referencia ao suposto recollido no artigo 4.4, parágrafo segundo, do Código Penal e pide á defensa que fixe a súa posición antes de adoptar unha decisión sobre esta cuestión.
O inicio da execución tamén afecta directamente á responsabilidade civil derivada do accidente, establecida inicialmente na sentenza e posteriormente modificada en parte pola resolución definitiva da Audiencia Provincial da Coruña.
Neste ámbito, o Tribunal de Instancia require á aseguradora QBE, declarada responsable civil directa, para que complete os pagamentos que aínda estean pendentes. A entidade dispón dun prazo dun mes para aboar as indemnizacións que non consten como totalmente satisfeitas.
O xulgado esixe ademais que a aseguradora detalle os pagamentos realizados ou pendentes, identificando o importe, o concepto e a persoa prexudicada correspondente en cada caso.
No mesmo prazo dun mes, QBE deberá entregar ao tribunal unha proposta de liquidación dos xuros que correspondan individualmente a cada unha das persoas afectadas polo accidente ferroviario.
Unha vez que o xulgado reciba esa documentación, dará traslado da proposta ás persoas prexudicadas. Estas poderán presentar as alegacións que consideren oportunas dentro da peza separada aberta para tramitar as cantidades económicas.
Con estas actuacións, o tribunal compostelán entra na fase de aplicación efectiva dos pronunciamentos derivados do proceso xudicial polo descarrilamento do tren Alvia no barrio de Angrois, ocorrido en Santiago en xullo de 2013.
