O Festival de Teatro Afeccionado Agustín Magán chega este ano á súa 25ª edición cunha programación que reunirá en Santiago de Compostela dez compañías de teatro amador procedentes de distintos puntos de Galicia, a cifra máis elevada desde a creación do certame. A programación estenderase entre o 5 de setembro e o 4 de outubro, con representacións no Salón Teatro, no Museo das Peregrinacións, na Sala Agustín Magán do Centro Sociocultural de Santa Marta e no Teatro Principal.

A nova edición foi presentada este xoves no Salón Teatro pola presidenta da Federación Galega de Teatro Afeccionado (Fegatea), Chelo Pampillón; o concelleiro de Centros Socioculturais de Santiago, Xan Duro; e o director xeral de Cultura da Xunta, Anxo Lorenzo. A organización corre a cargo de Fegatea coa colaboración do Concello de Santiago, a Dirección Xeral de Cultura e o Centro Dramático Galego.

O aniversario supón tamén 25 anos consecutivos de celebración do festival desde a súa posta en marcha en 2001, apenas un ano despois do nacemento de Fegatea. Pampillón lembrou que a programación se mantivo mesmo durante a pandemia, aínda que daquela foi necesario adaptar funcións e calendarios ás restricións existentes.

Para a presidenta da federación, o Magán converteuse co paso dos anos nunha das principais citas dentro da actividade anual da entidade. “O Magán é como a coroa”, resumiu durante a presentación. A responsable de Fegatea incidiu tamén na dependencia do apoio público para poder manter tanto esta cita como outras actividades desenvolvidas pola organización durante o ano, entre elas os circuítos, os cursos de formación e os Fegateatros.

DÚAS FUNCIÓNS ABREN O FESTIVAL NO SALÓN TEATRO

A programación teatral comezará este sábado 5 de setembro ás 20:00 no mesmo escenario no que foi presentada a edición. A compañía Disfunción Continua representará ‘As nenas raras non van ao ceo’.

Un día despois, o domingo 6 ás 20:00, será a quenda de Pena Furada, que levará ao Salón Teatro ‘Rosalía, a filla do mar’.

Tras esta primeira fin de semana, o festival incorporará unha das principais novidades desta edición: o Museo das Peregrinacións estrearase como sede do certame. O seu auditorio acollerá o 19 de setembro a partir das 19:00 unha sesión formada por pezas de pequeno formato.

Participarán nesa xornada Abran Paso, Ditea, Escoitade e O Trasno, o que permite incrementar o número de compañías presentes no Magán. Segundo explicou Pampillón, a incorporación desta modalidade ofrece espazo a catro formacións adicionais e amplía as posibilidades de participación dos grupos federados.

A programación continuará na Sala Agustín Magán do CSC de Santa Marta, un espazo especialmente ligado á historia do festival e á figura que lle dá nome. O 25 de setembro ás 19:00, Carauta representará ‘Moito ruido e poucas noces’, mentres que o día seguinte será Badius quen suba ao escenario con ‘O Parvo’.

O peche das representacións trasladarase ao Teatro Principal durante a primeira fin de semana de outubro. Atrezo presentará ‘Silencio!!’ o sábado 3 e Farándula Velutina representará ‘Mamá’ o domingo 4.

Todas as funcións incluídas no festival serán gratuítas.

UNHA XORNADA PARA CONECTAR GRUPOS NOVOS E VETERANOS

Ás representacións súmanse outras actividades vinculadas á celebración do 25 aniversario. O 12 de setembro, Fegatea organizará unha xornada de convivencia no Ramón Cabanillas, sede na que desenvolve parte da súa actividade.

A iniciativa xorde, segundo explicou Pampillón, a partir do incremento de novas compañías incorporadas á federación durante os últimos anos e do seu interese por coñecer a experiencia dos grupos cunha traxectoria máis prolongada. O encontro pretende facilitar un espazo no que compartir recursos, coñecementos, dificultades e propostas sobre o funcionamento da propia federación e do teatro afeccionado.

A presidenta explicou que a evolución dos grupos máis veteranos está ligada tamén á formación realizada ao longo das últimas décadas, cunha media de varios cursos anuais que permiten incorporar progresivamente novos coñecementos técnicos e recursos ás producións.

Outra das actividades complementarias chegará o 27 de setembro, tamén no espazo empregado pola federación, cun curso de maquillaxe impartido por Rubén Casal. Tanto esta formación como a xornada de convivencia estarán integradas na programación especial do aniversario.

O CONCELLO REIVINDICA O PAPEL DO TEATRO AFECCIONADO

Durante a presentación, o concelleiro de Centros Socioculturais, Xan Duro, destacou a continuidade dun festival que alcanza o cuarto de século sen interrupcións e situou os grupos de teatro amador como “a columna vertebral” da iniciativa.

O edil incidiu na capacidade destas formacións para achegar as artes escénicas a persoas e localidades que doutro xeito poderían ter menos contacto co teatro. Segundo manifestou, Fegatea desempeña “un papel fundamental na democratización da cultura e no achegamento do teatro a públicos moi diversos”.

Duro destacou tamén o regreso da programación á Sala Agustín Magán de Santa Marta, que cualificou como un dos principais equipamentos da rede municipal de centros socioculturais para este tipo de actividades. O concelleiro lembrou que o feito de que este espazo leve o nome de Agustín Magán evidencia a vinculación histórica de Compostela co teatro afeccionado.

O Concello participa no certame tanto desde o departamento de Centros Socioculturais como desde a área de Cultura, que cede o Teatro Principal para as dúas últimas representacións.

Pola súa banda, o director xeral de Cultura, Anxo Lorenzo, sinalou que durante as semanas do festival Santiago volverá concentrar unha parte importante da actividade do teatro afeccionado galego. Lorenzo lembrou igualmente a colaboración da Xunta cos circuítos de Fegatea, que definiu como unha parte fundamental do traballo de difusión das compañías ao longo do ano.

O responsable autonómico subliñou tamén a vinculación de Agustín Magán coa historia do teatro afeccionado compostelán e coa propia federación, da que foi un dos impulsores. A programación deste ano continuará así unha iniciativa iniciada en 2001 e que, un cuarto de século despois, amplía tanto o número de participantes como os espazos utilizados na cidade.