Hoxe martes ábrese o prazo para solicitar as bolsas de comedor escolar, adquisición de material e realización de actividades extraescolares para o próximo curso 2024-2025 no Concello de Santiago.
A Concellaría de Dereitos e Servizos Sociais da capital galega destina 1.100.000 euros a estas axudas, que se poderán solicitar ata o 3 de xuño.
Segundo destacou o Executivo local, o orzamento desta convocatoria é case un 40% superior ao da anterior, que contaba cun orzamento de 795.000 euros.
Entre as novidades que explicou a concelleira María Rozas, hai cambios nos criterios de baremación e nas contías das axudas, co obxectivo de “chegar a máis familias e facer unha aposta real pola igualdade de oportunidades”.
Para facilitar a xestión das solicitudes, hoxe terá lugar unha xornada informativa na Casa das Asociacións de Benestar Social, en Salgueiriños, a partir das 10:00. Ademais, os diferentes puntos de atención de Servizos Sociais atenderán a todas as persoas interesadas de luns a venres, en horario de 9:30 a 11:00.
