O Grupo Municipal Socialista de Santiago cargou este mércores contra as explicacións ofrecidas pola alcaldesa, Goretti Sanmartín, sobre os contactos mantidos polo Concello con Fly2Galicia, despois da controversia xerada arredor do proxecto empresarial e das informacións relativas aos seus posibles vínculos con capital israelí.
O concelleiro socialista Sindo Guinarte considera que as declaracións da rexedora buscan “desviar a atención, evadindo calquera tipo de responsabilidade” sobre as negociacións ou conversas desenvolvidas nos últimos meses. Ao seu xuízo, as explicacións dadas desde o Goberno municipal evidencian diferenzas entre o relato ofrecido inicialmente pola área de Turismo e a posición trasladada posteriormente pola alcaldesa.
Guinarte sostén que Sanmartín “emenda a concelleira de Turismo”, Míriam Louzao, e interpreta esta situación como unha mostra da falta de coherencia que atribúe ao Executivo de BNG e Compostela Aberta na xestión deste asunto.
Segundo o edil socialista, representantes do Goberno local viñan destacando durante os últimos meses os contactos con Fly2Galicia no marco da procura de novas conexións aéreas para o aeroporto Rosalía de Castro, mentres que posteriormente trataron de marcar distancias coa iniciativa unha vez transcenderon informacións sobre a estrutura empresarial vinculada ao proxecto.
“O BNG pasa de gabarse por levar meses falando coa empresa para conseguir novos destinos e, apenas un día despois, unha vez coñecidas as informacións sobre posibles vínculos do proxecto con capital israelí, a desvincularse da iniciativa”, afirmou Guinarte.
O representante socialista sitúa precisamente nese cambio de discurso unha das súas principais críticas. “Non se pode presumir dun logro cando interesa e ao día seguinte intentar desmarcarse porque politicamente resulta incómodo”, sinalou.
Para o PSOE compostelán, a cuestión central pasa agora por coñecer o alcance concreto das xestións realizadas polo Concello, que interlocutores participaron nelas e de que información dispoñía o Goberno municipal durante os contactos coa empresa.
Guinarte cualificou de “irresponsabilidade” que un Executivo que aseguraba estar traballando desde había meses nun proxecto relacionado coa conectividade aérea da cidade non detallase, segundo a súa valoración, as características desas conversas.
“Parece unha irresponsabilidade que un goberno que asegura levar meses traballando nun proxecto importante para Santiago non saiba explicar con claridade con quen estaba falando, que xestión realizou ou que información tiña sobre a empresa”, afirmou o concelleiro.
