Un total de 34 persoas afeccionadas á fotografía chegadas de distintos puntos de Galicia participaron este sábado na primeira quedada fotográfica ‘Coñece o concello de Boqueixón’, unha iniciativa organizada por Fotowalk Galicia en colaboración co Concello de Boqueixón para achegar aos participantes diferentes espazos naturais, culturais e turísticos do municipio.
A actividade desenvolveuse durante toda a xornada a través dun percorrido por varios puntos do concello, con especial presenza de Ponte Ledesma e o Pico Sacro, dous dos enclaves patrimoniais e paisaxísticos da comarca de Santiago incluídos no programa preparado para esta primeira convocatoria.
O concelleiro de Cultura, Educación e Novas Tecnoloxías, Gonzalo Redondo, recibiu o grupo antes do inicio das actividades. Durante a benvida, o edil animou os participantes a presentar os seus traballos nunha nova edición do concurso fotográfico municipal ‘Boqueixón en imaxes’.
O certame busca reunir fotografías realizadas no termo municipal e premiará aquelas propostas que amosen diferentes aspectos de Boqueixón, desde as súas paisaxes ata as celebracións, festas e actividades que se desenvolvan ao longo do ano.
Tras a recepción, os participantes iniciaron a programación cunha visita guiada a Ponte Ledesma, núcleo atravesado polo río Ulla e situado nun dos puntos de conexión histórica entre Boqueixón e Vila de Cruces. O paseo permitiu aos asistentes coñecer o lugar ao tempo que buscaban localizacións e composicións para as súas fotografías.
A seguinte parada da mañá levou o grupo ata os viñedos de Donax, onde a actividade incorporou tamén unha aproximación á produción vitivinícola da zona. A expedición participou nunha cata e degustación dentro do proxecto de enoturismo María Manuela, incorporando así a gastronomía e o viño ao itinerario fotográfico.
Despois de xantar nun establecemento hostaleiro do municipio, a programación trasladouse ao Pico Sacro, un dos principais referentes naturais e históricos de Boqueixón e da contorna compostelá. Alí, os 34 participantes realizaron outra visita guiada para coñecer o monte e aproveitar as súas vistas como escenario para novas imaxes.
A parada no Pico Sacro incluíu ademais un obradoiro de edición fotográfica no Centro de Interpretación do Pico Sacro, co que a xornada incorporou unha vertente formativa destinada ao tratamento posterior das fotografías tomadas durante o percorrido.
A primeira edición de ‘Coñece o concello de Boqueixón’ concluíu coa participación do grupo nunha das sesións de ‘Tardeos no Pico’, a programación de lecer organizada no monte ilicino. A proposta contou cun servizo de food-truck e prolongouse ata avanzada a noite.
