O concelleiro non adscrito de Santiago Gonzalo Muíños reclamou ao goberno municipal información detallada sobre o estado do contrato do novo transporte urbano despois de coñecerse a presentación dun novo recurso ante o Tribunal Administrativo de Contratación Pública de Galicia (Tacgal).
O edil pediu ao executivo encabezado por Goretti Sanmartín que explique “con total transparencia” tanto a situación administrativa na que queda agora o expediente como as consecuencias que a impugnación pode ter sobre o calendario anunciado para a posta en marcha da nova rede de autobuses.
O Concello acordara en xullo a adxudicación do contrato á empresa Monbus e contemplaba formalizalo ao longo deste mes de agosto, despois de transcorrer o prazo regulamentario de 15 días. A previsión municipal apuntaba a que o novo sistema puidese entrar en funcionamento durante o outono, xa que o contrato establece un período máximo de tres meses desde a súa sinatura para iniciar o servizo.
Porén, a aparición dun novo recurso, coñecida publicamente este sábado, introduce outra fase na tramitación. O escrito deberá ser analizado agora polo Tacgal, polo que Muíños considera necesario que o Concello concrete canto antes se esta circunstancia pode modificar os tempos previstos inicialmente.
O concelleiro cuestionou neste sentido os “anuncios precipitados” realizados polo goberno local arredor da contratación e censurou que se trasladase á cidadanía un calendario que, segundo sostén, foi presentado “por totalmente seguro e pechado”.
Muíños acusou ademais ao executivo municipal de “volver caer no mesmo erro de sempre”, que identificou cunha actitude de “triunfalismo e precipitación cando hai que facer a foto” fronte ao “silencio e ocultismo cando xorden os atrancos de xestión”.
RECLAMA COÑECER O EFECTO SOBRE O CALENDARIO
Entre as cuestións que o edil demanda aclarar figura o “impacto real” do recurso sobre a formalización do contrato e sobre a data prevista para o inicio do novo servizo. Ao seu xuízo, a transcendencia da contratación obriga a manter informada á veciñanza sobre calquera incidencia que poida afectar á súa posta en marcha.
“Desde o noso grupo sempre nos alegramos de cada avance que se poida dar nun servizo fundamental como é o transporte urbano, pero tamén advertimos desde o primeiro momento de que había que actuar con prudencia”, afirmou Muíños.
O concelleiro engadiu que este tipo de expedientes están sometidos a procedementos administrativos complexos e poden atoparse con incidencias durante a súa tramitación. “Sabemos perfectamente o complexos que son estes contratos e os riscos de dar pasos en falsos”, sinalou.
Por este motivo, considera “especialmente preocupante” que, despois das comunicacións realizadas polo Concello arredor do futuro modelo de mobilidade, o coñecemento do recurso non estivese acompañado dunha explicación pública máis ampla sobre o punto no que queda o expediente.
Muíños solicita así que o goberno municipal informe “de maneira inmediata” sobre os seguintes pasos administrativos e a posible afectación aos prazos. O recurso pasa agora ao Tacgal, que deberá tramitalo antes de que poida determinarse como continúa o procedemento dunha contratación chamada a renovar o servizo de transporte urbano de Santiago.
