A conexión aérea entre Santiago de Compostela e Newark/Nova York contará durante os próximos meses cunha campaña específica de promoción no mercado estadounidense. Turespaña e United Airlines asinaron un convenio para desenvolver conxuntamente accións de publicidade, mercadotecnia e apoio á comercialización vinculadas coa ruta que a aerolínea estreou no aeroporto compostelán o pasado mes de maio.
O acordo, publicado este martes no Boletín Oficial do Estado (BOE), establece un investimento inicial de 200.000 dólares, equivalentes a uns 173.380 euros, que será financiado ao 50% polas dúas entidades. Deste xeito, tanto Turespaña como United Airlines achegarán 100.000 dólares para as actuacións previstas.
A finalidade da colaboración é promocionar España como destino turístico entre o público estadounidense, aproveitando a nova conexión directa coa capital galega. O convenio tamén busca mellorar a visibilidade dos destinos, produtos e experiencias turísticas aos que os viaxeiros poden acceder a través desta ruta.
As principais actuacións consistirán en campañas conxuntas en medios de pago, que se desenvolverán preferentemente a través de soportes dixitais. O acordo deixa aberta, con todo, a posibilidade de empregar medios convencionais ou fóra da internet cando se considere que poden resultar eficaces e permitan medir os resultados obtidos.
A estas campañas poderán engadirse accións realizadas a través dos medios propios de Turespaña e United Airlines, así como iniciativas específicas destinadas a favorecer a comercialización da conexión entre Estados Unidos e Santiago.
O INVESTIMENTO PODERÍA SUPERAR OS 190.000 EUROS
No caso de que se incorporen estas actuacións complementarias, o orzamento poderá aumentar nun 10% adicional sobre os 200.000 dólares previstos inicialmente. Isto suporía outros 20.000 dólares, arredor de 17.338 euros, tamén financiados a partes iguais polas dúas entidades.
Así, o investimento conxunto ligado á promoción da ruta podería alcanzar os 220.000 dólares, uns 190.718 euros, no caso de utilizarse na súa totalidade esta partida adicional.
O convenio establece tamén que a creatividade definitiva das campañas deberá ser consensuada e contar coa aprobación de Turespaña antes da súa difusión.
Para definir as actuacións concretas constituirase unha comisión mixta de seguimento, encargada de elaborar o correspondente plan de medios e de supervisar o desenvolvemento do acordo. Este órgano deberá reunirse, como mínimo, unha vez cada mes durante a execución das accións previstas.
O calendario recollido no convenio concentra as campañas durante os meses de agosto e setembro, coincidindo cos primeiros meses de funcionamento da conexión transatlántica aberta por United Airlines entre Newark/Nova York e Santiago.
