A portavoz nacional do BNG, Ana Pontón, participou este mércores na presentación de Escarlata Pampín como candidata dos nacionalistas á Alcaldía da localidade coruñesa de Ames, co obxectivo de “recuperar o impulso e o avance”.
No acto, a líder nacionalista asegurou que a candidata “ten a forza, o proxecto e o liderado que se necesita” e insistiu en que irán “a por todas” cun proxecto que “poña aos veciños no centro das políticas”.
Pola súa banda, Pampín avanzou que quere ser a alcaldesa que lidere “unha nova etapa en Ames” construída desde “a experiencia”, un proxecto “ilusionante e ambicioso”. “Xa demostramos que sabemos gobernar. Agora necesitamos da forza dos veciños para liderar un novo tempo para Ames”, reivindicou.
Nesta liña, defendeu que o slogan ‘Á altura de Ames’ é “un compromiso”, destacando que o municipio xa se converteu “nun dos grandes motores de Galicia“, así como “novo, dinámico, cheo de talento e de oportunidades”.
