O Concello de Santiago asegurou que o número de avisos por presenza de ratas notificados nas últimas semanas é “consistente” co volume de incidencias rexistradas na mesma zona o ano anterior e coa época estival. Segundo trasladaron fontes municipais, desde o mes de xuño leváronse a cabo 14 actuacións de control de roedores na zona do Ensanche, a través da empresa Saniastur, dentro do programa habitual de vixilancia e mantemento.
En cada unha destas intervencións revisouse a zona afectada, retiráronse cebos previos con signos de consumo ou en mal estado, recolléronse cadáveres de roedores e tomouse nota dos posibles focos problemáticos. Entre eses puntos, o Concello sinala a existencia de locais abandonados ou a presenza de restos de residuos que poidan favorecer a aparición destes animais.
ACTUACIÓNS REPETIDAS NO PARQUE DE RAMÍREZ E EN EDUARDO PONDAL
Raxoi indicou que só foi necesario realizar máis dunha actuación no Parque de Ramírez e nun punto concreto da rúa Eduardo Pondal, neste último caso nunha zona de maleza. O Goberno compostelán enmarca estas intervencións dentro do seguimento ordinario que se realiza durante os meses de maior actividade dos roedores, especialmente no verán.
Ademais, o Concello informou de que este luns se realizou unha actuación de reforzo nas inmediacións da Praza Roxa. Nos próximos días volverase revisar a zona para comprobar se existe consumo dos cebos colocados e reforzar o tratamento no caso de que sexa necesario.
