O goberno de Santiago rexeitou o recurso de reposición interposto por Urbaser contra unha multa de 20.025 euros polo “incumprimento” na execución do contrato de servizos para a recollida convencional de residuos e limpeza viaria.
Así o anunciou este luns a portavoz municipal, Míriam Louzao, nunha rolda de prensa posterior á xunta de goberno local, que detallou que o recurso foi interposto o 28 de novembro de 2025 contra a resolución municipal do 29 de outubro de 2025.
O importe corresponde a cinco penalizacións, entre as que se atopan a “falta” dos medios persoais comprometidos, cualificada como moi grave (9.015,19 euros); a “falta e demora” na posta a disposición do servizo da infraestrutura informática e tecnolóxica comprometida (3.005,06 euros); así como as “deficiencias” na limpeza e desinfección de colectores (6.005,12 euros).
“Á vista de que os motivos das sancións están totalmente acreditados e que a súa imposición respectou todos os requisitos legais, confírmase plenamente a resolución”, remarcou Louzao.
