O Concello de Santiago pechou o exercicio económico de 2025 cunha liquidación orzamentaria cun superávit de 4,6 millóns de euros. Este dato apuntouno o concelleiro de Facenda, Manuel César Vila, que presentará os resultados das contas no pleno do mes de xullo.
A principal conclusión que extrae o concelleiro dos informes elaborados polo ente local ten unha “solvencia a curto e medio prazo” nas súas contas municipais e que os ingresos foron “suficientes” para a cobertura de todos os gastos orzamentarios.
En resumo, atendendo ás regras fiscais, o Concello cumpre a da estabilidade fiscal e a relativa ao endebedamento, que está “moi lonxe” do máximo legal permitido (75 %) ao situarse nun 30,01 %. A única incumprida é a relacionada co teito de gasto, o que, segundo asegurou, é imputable a “un erro” na comunicación de datos do exercicio de 2023, que foi trasladado ao Ministerio de Facenda.
En todo caso, os datos actuais indican que o gasto do exercicio 2025 non pode superar en máis de 3,2 % o gasto computable de 2024. “O cálculo sobre o expediente de 2024 indica o cumprimento (3,14 %), pero, polo devandito erro, alcanzaría o 3,40 e por tanto supérase en dúas décimas”, explicou o ente local.
O orzamento aprobado en 2025 foi de máis de 146 millóns, que, como resultado de incorporar os créditos dos exercicios anteriores, ascendeu a máis de 214 millóns. “Como resultado da execución orzamentaria, autorizáronse gastos por máis de 177 millóns e o recoñecemento de obrigacións chegou a algo máis de 140 millóns”, apuntou o edil. Destes preto de 140 millóns, pagáronse preto de 130.
Ademais do superávit de case 4,6 millóns de euros, a execución de ingresos é “similar” á do ano anterior (do 64 %) e, en gastos, a execución é maior en máis de catros puntos porcentuais, chegando ao 65,45 % en 2025. Desta forma, o esforzo impositivo superou os 668 euros por habitantes, un que, segundo recolleu Manuel César, está por baixo da media estatal.
‘CORRESPONDENCIA ECOLÓXICA’
Por outra banda, o Concello cambiará o envío dos recibos en papel pola comunicación electrónica, o que se traducirá en que as persoas susceptibles de participar nesta campaña e outras interesadas niso recibirán na súa bandexa de correo o PDF co recibo ou recibos ao comezo do respectivo período voluntario de cobro.
Esta campaña, baixo o nome de ‘Correspondencia Ecolóxica’, sucede no marco da próxima recadación do imposto sobre bens inmobles (IBI) e o imposto sobre actividades económicas (IAE). En concreto, existen dados de alta 4.786 persoas que poderían ser susceptibles de participar nesta campaña, xa que estas xa teñen que comunicarse electronicamente co Concello.
Neste sentido, están levándose adiante dúas campañas informativas: unha para comunicar a estas persoas que xa están incluídas no sistema de correspondencia e outra para convidar ás que non o están pero que teñen un correo electrónico no sistema. Neste último caso, o Concello cifra en 17.000 as persoas aludidas.
Para incorporarse ao sistema, existen tres vías: darse de alta as persoas interesadas na sede electrónica do Concello; enviar un correo electrónico á Oficina de Atención ao Contribuínte, ou facelo de maneira presencial nas oficinas de Atención ao Contribuínte. Por outra banda, a medida incorporará xa aos grandes contribuíntes, que no Concello ascenden a 108 altas.
A campaña está orientada a reducir o uso do papel nas comunicacións municipais e a minimizar o impacto ambiental do envío postal. Ademais destes, os beneficios son máis amplos: evitar desprazamentos innecesarios e posibles esperas e incomodidades, entre eles.
CAMBIOS NAS BONIFICACIÓNS DO IBI
Do mesmo xeito, o Concello tamén está a comunicar estes días os cambios producidos nas bonificacións do IBI por carencias de servizos.
Como sinala a ordenanza reguladora do imposto, as bonificacións van desde o 30 % (carencia dun servizo: auga, saneamento e iluminación pública), pasando por 60 % (carencia de dous servizos) e chegando ata o 90 % (carencia do tres servizos).
