O presidente da Xunta e líder do PPdeG, Alfonso Rueda, dixo ter “aprecio persoal” cara ao delegado do Goberno e candidato do PSOE á alcaldía de Santiago, Pedro Branco, ao ser unha persoa “moi respectuosa institucionalmente”. No entanto, deixa claro que: “Eu cada vez vexo máis preto as posibilidades de Borja Verea como futuro alcalde de Santiago”.
Así se expresou a preguntas da prensa en relación coa designación de Pedro Branco como candidato socialista na capital de Galicia. Nesta liña, Rueda opina que “non debe ser sinxelo” ser delegado do Goberno de Pedro Sánchez “nin ser candidato” nun lugar como Santiago no que “todos” coñecen “a evolución que tivo o PSOE durante esta lexislatura e nos últimos anos”.
“Sorprendeume que o actual líder do PSOE en Santiago non asuma a papeleta”, dixo en referencia a Aitor Bouza, aínda que “cada partido saberá o que ten que facer”. Por todo iso, o tamén xefe de filas dos populares galegos considera que se “reforza a necesidade de estabilidade e dirección” no Concello de Santiago.
