A alcaldesa de Santiago e candidata do BNG para as próximas eleccións municipais, Goretti Sanmartín, indicou que cada partido “ten os seus tempos e os seus prazos”, respecto ao paso adiante do delegado do Goberno, Pedro Blanco, a encabezar a lista do PSdeG. En rolda de prensa este venres, a mandataria local foi preguntada por unha valoración tras coñecerse a candidatura de Blanco, ao decidir non presentarse a vicesecretaria xeral do PSOE compostelán, Marta Álvarez Santullano.
Respecto diso, sinalou que “respecta os procesos de cada organización” e que cada unha “ten os seus tempos e os seus prazos”. Igualmente, asegurou que “se alegra” de que concorran ás eleccións candidaturas coas que teñen “experiencia de acordo, debate e diálogo”. “Segura de que estean formadas por quen estean formadas continuaremos dialogando, falando, chegando a acordos, que é o lóxico”, salientou. Neste sentido, remarcou que desde o punto de vista do Goberno municipal “seguen centradas en traballar e en sacar adiante” os grandes retos que ten Santiago. “Sabemos que estamos nun bo camiño e imos continuar facendo ese traballo porque, insisto, queda moito para as eleccións”, concluíu.
