A alcaldesa de Santiago, Goretti Sanmartín, valorou este venres como unha “moi boa noticia” a presentación dunha proposta para construír o novo aparcadoiro do Complexo Hospitalario Universitario de Santiago (CHUS), unha infraestrutura que o Concello considera necesaria para dar resposta aos problemas de mobilidade que se rexistran desde hai anos na contorna hospitalaria.
A rexedora lembrou que xa transcorreron dous anos desde a sinatura do protocolo coa Xunta de Galicia e sinalou que, durante este tempo, o Goberno local solicitou tanto por vías informais como formais a convocatoria da comisión de seguimento. Segundo explicou, o Concello quería coñecer e participar no deseño dunha actuación tramitada como plan de interese autonómico e que afecta a unha das áreas de maior presión circulatoria da cidade.
Sanmartín recoñeceu que a espera foi “moi longa”, especialmente ao tratarse dunha obra “esperada” e dunha infraestrutura que cualificou de “imprescindible” para Santiago e para o conxunto da súa área sanitaria. Con todo, incidiu en que o relevante neste momento é que se abran vías para resolver unha demanda vinculada ao funcionamento diario do hospital, ao seu proceso de ampliación e á posta en marcha do futuro centro de protonterapia.
O proxecto presentado na comisión de seguimento incorpora un cambio sobre a formulación inicial da Xunta, xa que sitúa o estacionamento na zona da avenida Mestra Victoria Míguez, con acceso directo desde esa vía. A alcaldesa indicou que o Concello non pode facer aínda unha análise completa porque a documentación recibida é, polo de agora, limitada, pero avanzou que a nova localización lle parece, en principio, “unha boa idea”.
Segundo Sanmartín, esta modificación podería contribuír a reducir o tráfico rodado na parte superior da contorna hospitalaria, facilitar unha entrada máis peonil aos edificios e ordenar mellor os espazos libres. En todo caso, insistiu en que será necesario estudar con detalle a solución arquitectónica, a integración urbana, as vías interiores, os accesos e o tratamento da fachada prevista, dada a dimensión da actuación.
A alcaldesa subliñou que o Concello defenderá que o proxecto permita resolver o problema de estacionamento sen renunciar a unha contorna urbana de calidade. Nesa liña, lembrou que o Goberno local sempre apostou por que un equipamento destas características se executase preferiblemente baixo rasante, ao considerar que esa opción permitiría compatibilizar a creación de prazas coa mellora do espazo público.
Sanmartín tamén destacou a achega municipal comprometida para facer posible a actuación. O Concello asumirá o 10% do custo dos terreos e das obras e aplicará unha bonificación do 95% no ICIO e no IBI, unha contribución que a rexedora cualificou de “moi importante” e que enmarcou na vontade municipal de colaborar na solución dos principais retos da cidade.
O futuro aparcadoiro contará con 1.500 prazas, unha cifra que o Goberno local ve necesaria nun ámbito que xa se atopa “moi sobrecargado” e no que se prevé un incremento da demanda pola ampliación do complexo hospitalario. Mentres a obra definitiva non estea executada, Sanmartín defendeu a importancia de habilitar solucións provisionais e lembrou que o Concello xa puxo á disposición unha parcela acondicionada para estacionamento temporal.
Preguntada polos prazos da actuación, a alcaldesa recoñeceu que son máis longos do que lle gustaría ao Goberno municipal. Aínda así, apuntou que se trata dunha obra complexa, con procedementos que deben garantir a súa correcta tramitación. “Pedimos á Xunta de Galicia a máxima celeridade posible”, afirmou, antes de insistir en que o Concello manterá unha colaboración “total” desde as áreas de Urbanismo, Mobilidade e Obras.
Sanmartín tamén foi preguntada pola reacción do portavoz municipal do Partido Popular, Borja Verea, que celebrou o avance do proxecto. A alcaldesa interpretou esa posición como positiva, aínda que aproveitou para reclamar ao PP unha actitude similar noutros asuntos que considera relevantes para Santiago, como a parcela de Peleteiro, a reivindicación da capitalidade ou outros proxectos urbanos pendentes.
A rexedora afirmou que o Goberno local leva dous anos esperando avances e que en decembro do ano pasado solicitou formalmente a convocatoria da comisión de seguimento, que finalmente se reuniu seis meses despois. A partir de agora, indicou, o Concello agarda recibir o estudo, anteproxecto ou documento técnico que permita analizar a proposta con maior precisión e avanzar na tramitación administrativa.
OS XOGOS DO EIXO ATLÁNTICO TRASLADAN A INAUGURACIÓN A SAN LÁZARO POLA CALOR
Sanmartín tamén informou de que a cerimonia inaugural dos Xogos do Eixo Atlántico, prevista inicialmente na praza do Obradoiro, será trasladada ao Estadio Verónica Boquete de San Lázaro por mor das altas temperaturas previstas para os vindeiros días.
O acto celebrarase o domingo, 5 de xullo, ás 18:30, coa participación das delegacións visitantes e da representación local. A alcaldesa animou a veciñanza de Santiago e da comarca a participar nas actividades e competicións, que serán de entrada libre.
A rexedora explicou que a decisión responde á duración do evento e á presenza de numerosas persoas participantes, moitas delas menores, nun contexto de alerta pola calor. A comisión organizadora, engadiu, fará seguimento da evolución meteorolóxica para garantir o confort e a seguridade tanto das persoas deportistas como do público.
Nesta edición, os xogos celebraranse entre o 5 e o 10 de xullo e contarán por primeira vez con criterios de paridade de xénero, con competicións masculinas e femininas en todas as disciplinas.
A DEPUTACIÓN PROPÓN ADXUDICAR A OBRA DO NOVO ESPAZO CUBERTO DA ROCHA
A alcaldesa informou ademais da proposta de adxudicación por parte da Deputación da Coruña da obra para construír un novo espazo de usos múltiples no centro sociocultural da Rocha. A actuación permitirá levantar un adro cuberto na parte traseira do edificio, pensado para acoller actividades da asociación veciñal e do Concello.
Sanmartín explicou que se trata dunha demanda prolongada no tempo, xa que o salón situado na planta superior do centro resultaba pequeno para moitas das actividades programadas pola veciñanza. A nova cuberta permitirá utilizar o exterior con independencia da choiva ou do sol.
O proxecto ten un custo de 190.000 euros, incluíndo obra e redacción técnica. A Deputación achegará o 60% do financiamento e o Concello asumirá o 40% restante, inicialmente arredor de 74.000 euros.
A ALCALDESA DEFENDE MÁIS SOMBRA E VERDE URBANO FRONTE ÁS VAGAS DE CALOR
Preguntada pola previsión de altas temperaturas, Sanmartín sinalou que polo de agora existe unha alerta amarela e que o Concello seguirá pendente da evolución da situación. A alcaldesa vinculou este episodio coa necesidade de avanzar nun modelo urbano máis preparado para as emerxencias climáticas.
Nesa liña, citou actuacións como as obras da Pontepedriña, do ámbito de Sánchez Freire, da praza de Vigo ou da contorna do Morro de Vidal, nas que o Goberno local di priorizar máis arborado, pavimentos drenantes, espazos sombreados e unha maior presenza de verde dentro da cidade.
Sanmartín afirmou que Santiago debe seguir avanzando cara a unha cidade con máis zonas de sombra e espazos de socialización ao fresco, aínda que apuntou que Compostela conserva mellores condicións que outros lugares para resistir episodios de calor. “A emerxencia climática ten que ser unha prioridade absoluta”, concluíu.
