O Concello recibiu catro ofertas no proceso de licitación do contrato para as obras da fase III de melloras do Estadio Municipal Verónica Boquete de San Lázaro.
Tal e como informou o Concello compostelán, este contrato tramítase polo procedemento aberto e simplificado cun orzamento basee de 1.292.790,67 euros (IVE incluído) e ten un prazo de execución de catro meses.
A intervención inclúe a reparación das fachadas, as cubertas e os soportais do edificio e tamén substituirá o falso teito da cafetaría e as carpintarías do muro-cortina da porta 1.
O Consistorio lembrou que este complexo sufriu desde o inicio deficiencias estruturais que empeoraron cos 30 anos que leva en funcionamento.
No inicio do mandato realizouse unha avaliación de necesidades globais. Como resultado, estimouse necesaria un investimento de algo máis de 9,3 millóns, para o que o Concello destaca que é necesaria a colaboración doutras administracións.
O Estadio Verónica Boquete foi deseñado no ano 1990 polo arquitecto Andrés Fernández-Albalat Lois e foi inaugurado en xuño de 1993, froito dun convenio entre o Concello, a Xunta e o Consello Superior de Deportes.
