O conselleiro de Educación, Ciencia, Universidades e FP, Román Rodríguez, inaugurou este xoves unha xornada de traballo co equipo asesor do proxecto EdugalIA, que reunirá ata este venres a profesionais de diferentes universidades –como Oxford e Harvard– e institucións académicas para abordar o uso dos datos e a intelixencia artificial na educación.
En concreto, neste encontro participan representantes dos ámbitos tecnolóxicos e pedagóxicos das universidades de Harvard, Boston, Oxford e Finlandia, así como investigadores das universidades galegas.
Pero tamén profesionais de centros de investigación como o Cesga (Centro de Supercomputación de Galicia), o Supercomputing Center de Barcelona, a Real Academia de Ciencias Exactas, Físicas e Naturais de España, expertos en gobernación educativa, pedagogos e analistas de datos e IA.
Segundo subliñou a Xunta nunha nota de prensa, o obxectivo do encontro é “debater e profundar” no coñecemento sobre a anonimización de datos sensibles para que poidan ser usados pola IA.
Así como na implementación da plataforma de xestión GaliOrienta, que incorpora a intelixencia artificial ao servizo dos departamentos de orientación para previr o abandono educativo temperán e o absentismo escolar.
Con todo, o titular de Educación destacou a proxección nacional e internacional desta iniciativa, que está considerada como “o mellor proxecto de España co uso da intelixencia artificial ao servizo educativo” ao lograr 10 millóns de euros de financiamento a través do proceso de Compra Pública Innovadora.
