O portavoz do PP de Santiago, Borja Verea, denunciou este luns a situación económica do Concello en relación co pago a provedores e advertiu de que a Administración local terá que recorrer a un mecanismo extraordinario do Estado para facer fronte a oito millóns de euros en facturas pendentes. Segundo sinalou en rolda de prensa, a situación afecta a autónomos, pequenas e medianas empresas e persoas que prestan servizos para o Concello.
Verea enmarcou este asunto nun contexto que, ao seu xuízo, evidencia unha perda de capacidade de xestión por parte do Goberno local. O portavoz popular vinculou os atrasos nos pagos con outros problemas que, segundo indicou, se están a producir na cidade, como a seguridade, a convivencia, a limpeza ou o mantemento dos espazos públicos.
O dirixente do PP afirmou que o Concello acumula “centos” e mesmo “mil facturas” sen aboar e asegurou que a demora nos pagos se incrementa trimestre tras trimestre. “Isto non é un debate ideolóxico. Isto é unha cuestión básica de xestión pública”, declarou Verea, que engadiu que cando unha Administración tarda meses en pagar son os provedores quen acaban asumindo esa carga financeira.
Na súa intervención, Verea defendeu que pagar en prazo ás empresas e profesionais que traballan para o Concello non debe depender dunha decisión política, senón que constitúe unha obriga legal. “Pagar a quen traballa para o Concello non é unha opción, é unha obriga legal e tamén unha cuestión de respecto”, afirmou.
O portavoz popular tamén criticou a estrutura política do actual Goberno municipal, ao que acusou de contar con “máis asesores e altos cargos da historia recente de Santiago”. Segundo apuntou, esa ampliación non se traduciu nunha mellora da xestión. “Duplicaron a estrutura política do anterior mandato e, sen embargo, os datos de xestión non melloraron, empeoraron”, sostivo.
Fronte a esta situación, Verea presentou unha proposta para reducir o período medio de pago no Concello. O PP comprométese a situalo en 30 días durante o primeiro ano dun eventual mandato e a baixalo por debaixo dos 20 días a partir do segundo ano. Para conseguilo, o portavoz popular apelou á reorganización interna, á coordinación entre departamentos e ao seguimento político constante das facturas pendentes.
Preguntado sobre como se podería acadar esa redución nun Concello que, segundo indicou, presenta prazos de pago elevados, Verea respondeu que a clave está na “organización”, nas “prioridades claras” e nun “seguimento político permanente”. Nese sentido, apostou por revisar os procedementos administrativos, simplificar a tramitación e realizar un control semanal das facturas sen pagar.
“Claro que se pode facer. Hai administracións locais que o están facendo coas mesmas leis, os mesmos decretos e os mesmos requisitos”, asegurou. Na súa opinión, o problema en Santiago non se debe á falta de recursos nin á normativa vixente, senón á ausencia de prioridade política por parte do Goberno municipal.
Verea tamén cuestionou que o Executivo local poida atribuír a situación á falta de ferramentas informáticas ou á necesidade de cambiar aplicacións de control contable. O portavoz do PP considerou que esa explicación chega tarde e lembrou que o Goberno municipal realizou xa unha remodelación interna que, segundo dixo, debía servir para mellorar a xestión.
“Que veñan a poucos meses dunhas eleccións a dicir que van arranxar todo porque van cambiar unha aplicación creo que require moita máis seriedade”, afirmou. Para Verea, o Goberno local debe explicar por que non conseguiu resolver o atraso nos pagamentos e pedir desculpas ás empresas, autónomos e traballadores afectados.
O portavoz popular tamén criticou a xestión política realizada nos últimos anos e asegurou que Santiago precisa “abrir unha nova etapa”. Nesa liña, defendeu que o PP representa unha alternativa “unida, tranquila e centrada en Santiago” fronte ao que definiu como unha cidade instalada no atraso, no ruído e na falta de capacidade de resposta.
Durante a rolda de prensa, Verea foi preguntado tamén pola situación do Partido Socialista. O dirixente popular evitou entrar nos asuntos internos doutras formacións e asegurou que a súa prioridade é Santiago. “A xente non está pendente dos problemas internos dos partidos, senón de que a cidade funcione”, afirmou.
Segundo o portavoz do PP, a veciñanza reclama un Concello que dea resposta aos problemas diarios, manteña os barrios coidados e facilite oportunidades para desenvolver proxectos de vida na cidade. Por iso, insistiu en que o seu grupo continuará presentando propostas centradas na xestión municipal e no funcionamento ordinario da Administración local.
