O novo contrato de transporte urbano de Santiago deu este luns, 22 de xuño, un novo paso no seu proceso de adxudicación. A mesa de contratación propuxo como adxudicataria á unión temporal de empresas integrada por Alcalabus, Castromil e Autobuses Urbanos de Lugo, compañías pertencentes ao grupo Monbus, ao ser a oferta mellor valorada no procedemento aberto polo Concello en decembro de 2025.
A alcaldesa de Santiago, Goretti Sanmartín, valorou este martes os avances producidos no expediente e sinalou que o procedemento continúa segundo o previsto. En rolda de prensa, a rexedora indicou que os autobuses “veñen por bo camiño” e afirmou que “todo Compostela está de parabén” tras a proposta formulada pola mesa de contratación.
Segundo consta na acta da mesa, a UTE vinculada a Monbus acadou unha puntuación total de 89,15 puntos, o que a situou por diante do resto de empresas participantes no concurso. En segundo lugar quedou a UTE Stellae Urbano Santiago, con 82,84 puntos; seguida da Empresa Martín SA, con 60,50 puntos; Viguesa de Transportes SL, con 41,36 puntos; e Transportes Rober SAU, con 38,88 puntos.
A proposta non supón aínda a adxudicación definitiva do servizo, xa que a empresa mellor valorada deberá cumprir agora cos trámites administrativos pendentes. A partir deste momento, a UTE dispón dun prazo de 10 días hábiles para entregar a documentación requirida e facer efectivo o pagamento da fianza, así como das taxas e dos timbres municipais correspondentes.
Unha vez completado este trámite, unha nova mesa de contratación revisará a documentación presentada pola empresa proposta como adxudicataria. Se o procedemento continúa sen incidencias, o Goberno local prevé levar a proposta á Xunta de Goberno durante o mes de xullo, segundo avanzou Sanmartín.
