O colectivo Materfem, Maternidades Feministas Galegas, concentrouse na mañá deste martes diante do edificio xudicial de Santiago de Compostela para denunciar a actuación do xulgado específico de violencia de xénero da cidade. A entidade sostén que este órgano xudicial “non está a recoller as declaracións das mulleres” e que estaría a “minimizar” os casos denunciados.
A mobilización celebrouse despois dun auto no que, segundo explicou o colectivo, se denega unha orde de protección a unha muller que denunciara unha situación de malos tratos por parte da súa exparella contra ela e contra as súas fillas. Materfem critica que a resolución se refira aos feitos como unha “situación de conflito” e como “desavinzas”, reducindo o sucedido a unha “situación de crise de parella”.
Para a entidade feminista, esta formulación supón “unha mensaxe moi perigosa para a sociedade”. “A violencia de xénero non é un conflito de parella nin unha desavinza que pase co tempo. É malos tratos, é abuso e é violencia”, denunciaron desde o colectivo.
En declaracións aos medios, unha das portavoces de Materfem, Alicia Curral, explicou que a protesta pretende visibilizar “todos os casos” que, segundo o colectivo, se están producindo “en todo o país” arredor das denuncias por violencia de xénero. Curral afirmou que dispoñen de indicios de que os procedementos non se estarían tramitando coa atención debida.
“Temos probas de que non se están recollendo as declaracións das mulleres, non se están facendo as cousas ben”, sinalou a portavoz, que cualificou de “bastante perigoso” que algúns procedementos rematen arquivados cando, segundo indicou, o programa Viogén recollía elementos que apuntaban a malos tratos, acoso ou violencia vicaria.
Materfem cuestiona que mulleres que chegan ao xulgado tras denunciar este tipo de situacións non atopen, segundo a súa versión, o apoio institucional necesario. “Chegan a este xulgado e non se lles apoia”, lamentou Curral, que insistiu en que a concentración busca “porlle voz a todas esas mulleres”.
O colectivo mantén que non se trata dun caso illado. Segundo expuxeron as súas integrantes, desde que o xulgado compostelán está especializado en violencia de xénero habería “moitos casos” arquivados nos que, ao seu xuízo, non se tería dado unha resposta axeitada ás denunciantes.
Aínda que Materfem recoñece que non ten confirmado que esta situación se repita noutros xulgados galegos, si asegura ter recibido comunicacións de “varias mulleres” doutros puntos de Galicia que relataron experiencias semellantes. Por este motivo, a entidade enmarca a protesta nunha denuncia máis ampla sobre a atención xudicial ás vítimas de violencia machista.
A concentración diante dos xulgados de Santiago tivo así como obxectivo reclamar que as declaracións das mulleres sexan recollidas e valoradas nos procedementos, así como denunciar o uso de expresións que, segundo Materfem, poden contribuír a desactivar a gravidade das denuncias por violencia de xénero.
